نسخة الفيديو النصية
صنعت مروة اتناشر شطيرة من أجل نزهة. في نهاية اليوم تبقّى خمس شطائر. اكتب جملة طرح توضح ذلك، باستخدام علامة استفهام للدلالة على عدد الشطائر التي أُكلت.
عندنا بنت اسمها مروة. كانت رايحة نزهة ومعاها اتناشر شطيرة، أو اتناشر سندوتش. وفي آخر اليوم ما اتبقاش معاها غير خمس شطائر بس. عاوزين نكتب جملة طرح بتوضح اللي حصل في النزهة، أو التغيير اللي حصل في عدد الشطائر. وهنكتب جملة الطرح دي باستخدام علامة استفهام؛ علشان نعبّر عن الشطائر اللي اتّاكلت. وعندنا خمس أشكال، لخمس جمل طرح، هنعرف مين فيهم الشكل الصحيح.
دلوقتي محتاجين نكتب جملة طرح. وعلشان نكتب جملة طرح محتاجين نكتب عدد، ناقص عدد، يساوي عدد. دول كده عددين؛ عدد مطروح من التاني، وناتجهم عدد تالت. ولو جينا نطبّق ده على المسألة بتاعتنا، هنلاقي إن مروة في أول اليوم، كان معاها اتناشر شطيرة. يبقى العدد الكلي أو العدد الكبير اتناشر. اتّاكل منهم، أو خدنا منهم؛ يعني طرحنا عدد معيّن من الشطائر أو السندوتشات. واتبقّى معانا في آخر اليوم خمسة. يبقى الناتج هيساوي خمسة.
وإحنا عاوزين نكتب جملة الطرح دي، باستخدام علامة الاستفهام. يعني هنحطّ هنا علامة استفهام. ويبقى ده هو شكل جملة الطرح المطلوبة: اتناشر ناقص علامة استفهام يساوي خمسة. ولو جينا نبصّ على الاختيار ده، هنلاقيه هو اللي موجود هنا. يبقى الإجابة الصحيحة: اتناشر ناقص علامة استفهام يساوي خمسة.
