تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ضرب عدد مكوَّن من ثلاثة أرقام في عدد مكوَّن من رقمين

سوزان فائق

يوضح الفيديو كيفية ضرب عدد مكوَّن من ثلاثة أرقام في عدد مكوَّن من رقمين.

٠٨:٤٨

‏نسخة الفيديو النصية

في الفيديو ده، هنعرف إزّاي نضرب عدد مكوّن من ثلاثة أرقام في عدد مكوّن من رقمين.

مثلًا لو عدد زيّ مية أربعة وسبعين، مكوّن من تلات أرقام، مضروب في تمنية وسبعين، مكوّن من رقمين. هنعرف إزّاي نضربهم في بعض. أول حاجة لازم نعرفها إن العدد اللي بنضرب فيه ده، اللي هو التمنية وسبعين، عبارة عن تمنية زائد سبعين. عملية الضرب اللي هنستخدمها هيبقى فيها إن إحنا نضرب التمنية دي في المية أربعة وسبعين. وبعدين نجمعها على السبعين في المية أربعة وسبعين.

أول خطوة نعملها إن إحنا نرتّب العددين فوق بعض، بحيث إن كل خانة تحتها الخانة اللي زيّها بالظبط في نفس القيمة. يعني المية أربعة وسبعين تحتها التمنية وسبعين. التمنية في الآحاد، تبقى تحت الأربعة اللي في الآحاد. والسبعة في العشرات تحت السبعة اللي في العشرات، اللي في العدد مية أربعة وسبعين. وبعدين نضربهم في بعض رأسيًّا بالشكل ده.

بعد كده هنضرب الآحاد اللي موجودة في العدد التاني اللي مكوّن من رقمين. هنا التمنية هنضربها في المية أربعة وسبعين. واللي هيطلع عندنا ده هنجمعه على السبعة في المية أربعة وسبعين. بس بناخد بالنا إن السبعة دي قيمتها سبع عشرات. حاصل ضرب التمنية في المية أربعة وسبعين هيبقى … التمنية في الأربعة باتنين وتلاتين. اتنين ومعانا التلاتة. يبقى سبعة في تمنية بستة وخمسين. هنجمع عليهم التلاتة، يبقى تسعة وخمسين. نحطّ الخمسة فوق الواحد. نضرب الواحد في التمنية هيبقى تمنية. ونجمع عليهم الخمسة، هيبقى تلتاشر. يبقى حاصل ضرب التمنية في المية أربعة وسبعين هيبقى ألف تلتمية اتنين وتسعين.

بعد كده هنضرب السبعة في المية أربعة وسبعين. والسبعة دي قيمتها سبع عشرات. يبقى عارفين إنها كانت عبارة عن السبعين في المية أربعة وسبعين. فأول خطوة ناخد بالنا إن إحنا هنحطّ الصفر بتاع العشرات، اللي هو ناتج عن ضرب السبعين في المية أربعة وسبعين. الصفر بتبقى معانا، وبعد كده بنضرب السبعة في المية أربعة وسبعين كالآتي.

هيبقى مية أربعة وسبعين في سبعة. أربعة في السبعة هتبقى تمنية وعشرين. هيبقى معانا الاتنين. والسبعة في السبعة بتسعة وأربعين. هنجمع عليهم الاتنين هيبقى واحد وخمسين. الواحد، ومعانا الخمسة. سبعة في واحد بسبعة. والخمسة، يبقى اتناشر. يبقى ده حاصل ضرب السبعة في المية أربعة وسبعين. يعني بعد الصفر بيبقى ألف ميتين وتمنتاشر، وعلى يمينها صفر. فهيبقى قيمتها اتناشر ألف مية وتمانين. يبقى هنكتب هنا: تمنية، واحد، اتنين، واحد، بحيث إن كل خانة تحتها الخانة اللي زيّها بالظبط.

وهنجمع القيمتين دول على بعض. الاتنين تحتها الصفر في الآحاد. هنجمعهم على بعض هيبقى اتنين. تسعة وتمنية سبعتاشر. سبعة، ومعانا الواحد. هنحطّه فوق التلاتة. ونجمع التلاتة مع الواحد مع الواحد يبقى خمسة. وبعد كده نجمع الواحد والاتنين هيبقى تلاتة. وبعدين هننزّل الواحد؛ لأن ما فيش حاجة مجموعة عليه. يبقى حاصل ضرب المية أربعة وسبعين في التمنية وسبعين يساوي تلتاشر ألف خمسمية اتنين وسبعين.

نشوف مثال من حياتنا العملية. تستخدم مريم هاتفها المحمول ميتين خمسة وسبعين دقيقة شهريًّا. كم دقيقة تستخدم مريم هاتفها في سنة.

في المثال ده، هنضرب العدد ميتين خمسة وسبعين في عدد أشهر السنة؛ لأن هو بيقول لنا: كل شهر ميتين خمسة وسبعين دقيقة. والسنة فيها اتناشر شهر. يبقى هنضرب ميتين خمسة وسبعين في اتناشر. هنرتّبهم فوق بعض بالشكل ده، بحيث إن الآحاد تحت الآحاد، والعشرات تحتها العشرات. ونبدأ بضرب الاتنين اللي في الآحاد، اللي في العدد اتناشر. اتنين في خمسة بعشرة. صفر، وهيبقى معانا الواحد فوق السبعة. يبقى سبعة في اتنين بأربعتاشر. وواحد، خمستاشر. هنحطّ الواحد فوق الاتنين. اتنين في اتنين بأربعة، ونزوّد عليها الواحد يبقى دي خمسة.

بعد كده هنجمع عليها حاصل ضرب الواحد اللي في العشرات في الميتين خمسة وسبعين، اللي هي قيمتها عشرة. يعني هنحطّ الصفر في الأول، وبعدين نضرب الواحد في الميتين خمسة وسبعين. هتبقى ميتين خمسة وسبعين. وبعد كده نجمع العددين الناتجين عن حاصل الضرب. صفر زائد الصفر يبقى صفر. خمسة زائد خمسة … آدي عشرة. صفر، ومعانا الواحد. يبقى واحد وخمسة ستة. وسبعة، تلتاشر. زائد الـواحد. واحد زائد الاتنين يبقى تلاتة. إذن تستخدم مريم هاتفها المحمول تلات آلاف وتلتمية دقيقة في السنة.

هنشوف مثال كمان. اشترت مدرسة عدد خمسة وعشرين حاسب آلي مستعمل بسعر تسعمية خمسة وتمانين جنيه للواحد. ما القيمة الإجمالية التي دفعتها المدرسة لشراء الحاسبات الآلية؟

علشان نحسب القيمة الإجمالية اللي دفعتها المدرسة، هنضرب الخمسة وعشرين في سعر الجهاز الواحد، اللي هو التسعمية خمسة وتمانين. يبقى عايزين نضرب تسعمية خمسة وتمانين في خمسة وعشرين. أول حاجة هنضرب الخمسة اللي في آحاد العدد خمسة وعشرين في التسعمية خمسة وتمانين. يبقى تسعمية خمسة وتمانين في الخمسة. خمسة في الخمسة بخمسة وعشرين. معانا الاتنين. خمسة في تمنية بأربعين. ونجمع عليهم الاتنين يبقى اتنين وأربعين. يتبقَّى معانا أربعة. تسعة في خمسة بخمسة وأربعين. زائد الأربعة يبقى تسعة وأربعين. يبقى خمسة في تسعمية خمسة وتمانين هتبقى أربعة آلاف تسعمية خمسة وعشرين.

وهنجمع عليهم القيمة اللي هتنتج من ضرب الاتنين اللي في خانة العشرات في التسعمية خمسة وتمانين. اللي هي تسعمية خمسة وتمانين في الاتنين. خمسة في اتنين بعشرة. صفر، ومعانا الواحد. تمنية في اتنين بستاشر. وواحد، سبعتاشر. ومعانا الواحد. يبقى اتنين في تسعة بتمنتاشر. وواحد، يبقى تسعتاشر. وما ننساش إن دي عشرتين. يعني اتنين في عشرة. يعني فيه هنا، فيه صفر. وهنكتب العدد الناتج من ضرب التسعمية خمسة وتمانين في الاتنين بعد الصفر اللي في خانة الآحاد. يبقى صفر، سبعة، تسعة، واحد. بحيث إن إحنا بنرتّب كل خانة تحت اللي زيّها بالظبط. الخمسة هنجمعها على الصفر هتبقى خمسة. الاتنين هنجمعها على الصفر هتبقى اتنين. التسعة والسبعة ستاشر. يبقى ستة، وهيتبقّى معانا واحد. عشان نجمعه عَ الأربعة والتسعة، يبقى أربعة وتسعة تلتاشر. وواحد، أربعتاشر. أربعة، ومعانا واحد. باقي واحد، هنجمعه على الواحد هيبقى اتنين. إذن القيمة الإجمالية اللي دفعتها المدرسة هي عبارة عن أربعة وعشرين ألف ستمية خمسة وعشرين جنيه.

اتكلّمنا في الفيديو ده عن ضرب عدد مكوّن من ثلاثة أرقام في عدد مكوّن من رقمين. وقلنا: إن إحنا بنقسّم العدد المكوّن من رقمين لخانة الآحاد وخانة العشرات. بنضرب خانة الآحاد في العدد المكوّن من ثلاث أرقام. وبعدين نجمع الناتج على حاصل ضرب الرقم اللي في خانة العشرات مع العدد المكوّن من تلات أرقام.