فيديو: جمع الأعداد المكوَّنة من ثلاثة أرقام

يعرض الفيديو طريقة جمع الأعداد الصحيحة المكونة من ثلاثة أرقام باستخدام طريقة إعادة التسمية، مع التطبيق عليها بأمثلة حياتية ممتعة.

٠٦:٣٤

‏نسخة الفيديو النصية

جمع الأعداد المكوّنة من ثلاثة أرقام.

في الفيديو ده هنعرف إزاي نجمع الأعداد المكوّنة من تلات أرقام بطريقة سهلة وبسيطة. الطريقة دي اسمها إعادة التسمية. وهنشوف هنستخدمها إزاي. وهنحلّ المثال ده.

راجل زرع مية سبعة وعشرين شجرة برتقان، وتمنية وستين شجرة تفاح. عاوزين نعرف عدد الأشجار الكلي اللي زرعها الراجل ده. علشان نعرفه، هنجمع مية سبعة وعشرين زائد تمنية وستين. وقبل ما نجمع هنقدّر الناتج الأول. فالمية سبعة وعشرين تقريبًا مية وتلاتين. والتمانية وستين تقريبًا سبعين. ومجموعهم يساوي ميتين. يبقى عدد الشجر الكلي تقريبًا ميتين شجرة.

ودلوقتي هنبدأ نجمع باستخدام إعادة التسمية، فهنكتب المية سبعة وعشرين، وتحتها التمنية وستين بالشكل ده. ولازم ناخد بالنا إننا نكون كاتبين الأعداد بشكل صحّ. فنحطّ الآحاد تحت الآحاد، والعشرات تحت العشرات، والمئات جنبهم.

الخطوة الأولى هي جمع الآحاد. عندنا في المسألة الآحاد هم السبعة والتمنية. يبقى هنجمع سبعة زائد تمنية تساوي خمستاشر. ونعمل إعادة تسمية للخمستاشر. فهنلاحظ إن الخمستاشر بتتكوّن من تحذف خمسة آحاد، وواحد عشرات. فهنحطّ الآحاد عند الآحاد، والعشرات عند العشرات. إزاي؟ السبعة والتمنية آحاد، يبقى الخمسة تيجي تحتهم. أمّا الواحد عشرات، فهنحطّه فوق الاتنين والستة، اللي هم في خانة العشرات. وبكده نكون حطّينا الخمسة والواحد في مكانهم.

وتاني خطوة هي جمع العشرات. واللي بقى فيها واحد زائد اتنين زائد ستة. واللي بتساوي تسعة. التسعة هنا عشرات، فهنحطّها تحت خانة العشرات.

تالت خطوة والأخيرة هي جمع المئات. وهنلاحظ هنا إن خانة المئات ما فيهاش غير الواحد. ما فيش تحته حاجة تتجمع عليه، فبننزّله تحت خانة المئات زيّ ما هو.

يبقى كده إحنا جمعنا الآحاد، وبعدين جمعنا العشرات، والمئات. وكان الناتج النهائي مية خمسة وتسعين شجرة. وده عدد قريب من الناتج اللي قدّرناه قبل ما نحلّ المسألة، واللي كان ميتين شجرة.

هناخد كمان مثال على جمع عدد مكوّن من تلات أرقام، مع عدد تاني برضو مكوّن من تلات أرقام.

في محل لبيع مستلزمات الصيد، كان فيه صندوقين للشِّبَاك اللي بنصطاد بيها الفراشات. الصندوق الأول سعره مية خمسة وسبعين جنيه. الصندوق التاني سعره ميتين خمسة وعشرين جنيه. عاوزين نعرف سعر الصندوقين مع بعض كام. فهنجمع مية خمسة وسبعين زائد ميتين خمسة وعشرين، برضو باستخدام إعادة التسمية. هنكتبهم تحت بعض بشكل رأسي. الآحاد تحتها آحاد، والعشرات تحتها عشرات، والمئات تحتها مئات. ولازم ناخد بالنا من طريقة الكتابة، علشان ما نتلخبطش. ونبدأ في خطوات الحل.

أول خطوة هي جمع الآحاد. الآحاد عندنا خمسة زائد خمسة. فنقول خمسة زائد خمسة تساوي عشرة. ونبدأ نطبّق إعادة التسمية للعشرة. فهنلاقي إنها مكوّنة من صفر آحاد، والواحد عشرات. فنحطّ الآحاد تحت الآحاد، والعشرات تحت العشرات. آدي الصفر تحت الآحاد، والواحد في خانة العشرات، بنحطّه فوق العشرات. كده نكون أعدنا تسمية العشرة كصفر، وواحد.

ودلوقتي تاني خطوة هنعملها هي جمع العشرات. فالعشرات عندنا واحد زائد سبعة زائد اتنين. برضو ناتج جمعهم بيساوي عشرة. هنا الصفر هيكون عشرات، والواحد هيكون مئات؛ لأننا بنجمع العشرات. فهناخد الصفر تحت العشرات هنا، والواحد فوق المئات هنا.

ونيجي لتالت خطوة والأخيرة، وهي جمع المئات. فهنجمع واحد زائد واحد زائد اتنين. واللي هتساوي أربعة. والأربعة هنا مئات، فهنحطّها تحت خانة المئات بالشكل ده.

بكده نكون عرفنا ناتج الجمع الكلي لتمن الصناديق، واللي بيساوي ربعمية جنيه.

وبكده نبقى اتعلّمنا في الفيديو ده إزاي نجمع الأعداد المكوّنة من تلات أرقام. بجمع خانة الآحاد؛ وبعديها جمع خانة العشرات؛ وأخيرًا جمع خانة المئات. وده باستخدام طريقة إعادة التسمية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.