فيديو: إيجاد حجم مكعب بمعلومية طول حرفه

أوجد حجم المكعب، إذا كان طول حرفه ١٠/١ ؆(١٢) سم.

٠٢:٣٦

‏نسخة الفيديو النصية

أوجد حجم المكعب إذا كان طول حرفه واحد على عشرة الجذر التكعيبي لاتناشر سنتيمتر.

يعني مُعطى عندنا طول حرف المكعب، والمطلوب إننا نوجد حجمه. وخلينا في الأول نفتكر إن حجم المكعب بيساوي طول الضلع تكعيب. بما إن معطى عندنا في السؤال إن طول حرف المكعب اللي هو طول ضلعه واحد على عشرة الجذر التكعيبي لاتناشر سنتيمتر. فبالتالي هيبقى حجم المكعب بيساوي واحد على عشرة الجذر التكعيبي لاتناشر، الكل تكعيب. فيبقى المقدار بيساوي … أول حاجة هنوجد تكعيب واحد على عشرة، واللي هيبقى بيساوي واحد على، عشرة تكعيب. بعد كده هيبقى عندنا الجذر التكعيبي لاتناشر مرفوع للأس تلاتة. وخلينا نفتكر إن الجذر التكعيبي لأي عدد نقدر نكتبه في صورة اتناشر أس، واحد على تلاتة. فيبقى عندنا العدد ده مرفوع للأس تلاتة.

بعد كده هنبدأ نحسب. فهيبقى عندنا واحد مقسوم على عشرة أس تلاتة، وعشرة أس تلاتة بيساوي ألف. فهيبقى عندنا واحد على ألف. بعد كده هنيجي عند المقدار ده، فهنلاحظ إن عندنا عدد مرفوع لأس، والكل مرفوع للأس تلاتة. ففي الحالة دي هيبقى الناتج هو الأساس نفسه اللي هو اتناشر. وأما الأُس فبنضرب الأُس واحد على تلاتة، في تلاتة. وواحد على تلاتة في تلاتة بتساوي واحد. واتناشر أُس واحد باتناشر فيبقى المقدار هو واحد على ألف في اتناشر.

ومن هنا خلينا نفتكر إن لو عندنا الجذر التكعيبي لـ أ، والمقدار ده مرفوع للأس تلاتة، فيبقى الناتج هو ما بداخل الجذر؛ يعني هيساوي أ. فبنفس الطريقة لمّا كان عندنا هنا الجذر التكعيبي لاتناشر ومرفوع للأس تلاتة، فكان الناتج هو ما بداخل الجذر اللي هو اتناشر. فبالتالي هيبقى المقدار عندنا واحد على ألف في اتناشر. فلمّا نحسبها هتبقى بتساوي اتناشر على ألف.

ونقدر نختصر الكسر عن طريق إننا نقسم البسط والمقام على أربعة. فلمّا نقسم في البسط اتناشر على أربعة هتبقى بتساوي تلاتة. وأما في المقام فهنقسم ألف على أربعة واللي هتساوي ميتين وخمسين. فبالتالي هتبقى الإجابة هي تلاتة على ميتين وخمسين. وبما إننا بنوجد حجم المكعب فهتبقى الوحدة هي سنتيمتر مكعب. وبالتالي هيبقى حجم المكعب اللي مُعطى عندنا في السؤال هو تلاتة على ميتين وخمسين سنتيمتر مكعب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.