فيديو: التحليل إلى عوامل أوَّليَّة

عدد العوامل الأولية للرقم ٧٦ هو _ بدون تكرار.

٠٢:٥٥

‏نسخة الفيديو النصية

عدد العوامل الأولية للرقم ستة وسبعين هو، نقط، بدون تكرار.

علشان نعرف عوامل أي عدد، فممكن نستخدم طريقة التحليل. والعدد ستة وسبعين هو عدد زوجي؛ فممكن نقسمه على اتنين. ستة وسبعين على اتنين يا ترى بيساوي كام؟ علشان نعرف هيساوي كام، هنبدأ نقسم ستة وسبعين على اتنين.

وهنبدأ بقسمة العشرات، فهنقسم سبعة على اتنين. ونسأل نفسنا إيه العدد اللي لو ضربناه في اتنين يدّينا عدد قريب من السبعة. مثلًا ممكن تلاتة؛ لأن تلاتة في اتنين بيساوي ستة. تاني حاجة هنعملها، هنكتب ناتج الضرب ده تحت العشرات، وهنقول ستة. وبعد كده نطرح ستة وسبعين ناقص ستة، فهتكون ستة وواحد.

وبعدين نبدأ نقسم تاني. ستاشر على اتنين، بيساوي كام؟ يا ترى إيه العدد اللي لو ضربناه في اتنين يدينا ستاشر؟ هو العدد تمنية. وبعدين هنرجع نضرب تمنية في اتنين، ونكتب ناتج الضرب ده تحت الستاشر دي، ونبدأ نطرح تاني. وبكده نقدر نقول إنه ناتج القسمة هو العدد تمنية وتلاتين. ستة وسبعين على اتنين بيساوي تمنية وتلاتين.

وتمنية وتلاتين برضو عدد زوجي، فنقدر نقسمها تاني على اتنين. وبنفس الطريقة هنجيب ناتج قسمة تمنية وتلاتين على اتنين. هنبدأ بقسمة العشرات، ونقول تلاتة على اتنين. فهنكتب واحد؛ لأن واحد في اتنين بيساوي اتنين، وهو ده العدد اللي هنكتبه تحت العشرات. وبعدين نبدأ نطرح، تمنية وتلاتين ناقص اتنين بيساوي تمنتاشر.

وهنرجع نقسم تمنتاشر على اتنين. يا ترى إيه هو العدد اللي لمّا نضربه في اتنين يدينا تمنتاشر؟ هو تسعة. وآخر حاجة هنضرب التسعة دي في الاتنين، وحاصل الضرب هنكتبه تحت التمنتاشر. تسعة في اتنين بيساوي تمنتاشر. وبعدين نطرح تاني.

وبكده عرفنا إن ناتج قسمة تمنية وتلاتين على اتنين هو العدد تسعتاشر. والتسعتاشر هو عدد أولي لأنها مش بتقبل القسمة غير على نفسها وعلى الواحد. فهنقسم تسعتاشر على تسعتاشر، يساوي واحد.

وبكده عرفنا إن العدد ستة وسبعين هو عبارة عن حاصل ضرب العدد اتنين، في اتنين، في تسعتاشر. فنقدر نقول إن العوامل الأولية للعدد ستة وسبعين هي اتنين واتنين وتسعتاشر. ولأن مطلوب نجيب عددهم من غير تكرار، فعندنا لأن العدد اتنين متكرّر، فهنحذف واحد منهم. وبالتالي عدد العوامل الأولية هيكونوا عددين، اللي همّ اتنين وتسعتاشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.