فيديو: حل المسائل الكلامية التي تتضمَّن ضرب وطرح الأعداد العشرية

دفع رجل ١٢٠١٫٠٥ جنيه ثمنًا لـ ١٤٫٨٧٥ كجم من الجبن و٦٫٣٧٥ كجم من الزبد. إذا كان سعر الكيلوجرام الواحد من الزبد ٧٣٫٦٠ جنيهًا، فأوجد سعر الكيلوجرام الواحد من الجبن.

٠٤:٠٧

‏نسخة الفيديو النصية

دفع رجل ألف ميتين وواحد وخمسة من مية جنيه ثمنًا لأربعتاشر وتمنمية خمسة وسبعين من ألف كيلوجرام من الجبن، وستة وتلتمية خمسة وسبعين من ألف كيلوجرام من الزبد. إذا كان سعر الكيلوجرام الواحد من الزبد تلاتة وسبعين وستين من مية جنيهًا، فأوجد سعر الكيلوجرام الواحد من الجبن.

السؤال بيقول لنا: إن فيه راجل دفع ألف ميتين وواحد وخمسة من مية جنيه. دفعهم في إيه؟ اشترى بيهم حاجتين: جُبن وزُبد. فاشترى أربعتاشر وتمنمية خمسة وسبعين من ألف كيلوجرام جبنة، وستة وتلتمية خمسة وسبعين من ألف كيلوجرام زبدة. وعندنا مُعطى إن سعر الكيلوجرام الواحد من الزبدة تلاتة وسبعين وستين من مية جنيه. وعاوزين نعرف سعر الكيلوجرام الواحد من الجُبن بيساوي كام جنيه.

كده إحنا فسَّرنا السؤال. وعلشان نقدر نجاوبه ونعرف سعر الواحد كيلوجرام من الجبنة بيساوي كام جنيه، محتاجين نعمل تلات خطوات. الخطوة الأولى: هي إننا هنوجد ثمن الزبد اللي الراجل اشتراه. بعدين هنوجد ثمن الجبن اللي الراجل اشتراه. دي كده تاني خطوة. تالت خطوة والأخيرة: هي إننا هنوجد ثمن الواحد كيلوجرام جبنة من تمن الجبنة الكلّي اللي جِبناه في الخطوة التانية. وهو ده المطلوب منّنا في السؤال.

نبدأ بأول خطوة: إيجاد ثمن الزُّبد الذي اشتراه الرجل. ثمن الزبد يساوي ثمن الكيلوجرام الواحد من الزبد في عدد الكيلوجرامات. وإحنا عندنا في السؤال ثمن الكيلوجرام الواحد من الزُّبد تلاتة وسبعين وستين من مية جنيه. وعدد الكيلوجرامات اللي الراجل اشتراهم ستة وتلتمية خمسة وسبعين من ألف كيلوجرام. وحاصل ضربهم هو ربعمية تسعة وستين واتنين من عشرة جنيهًا. وده هو ناتج حلّ أول خطوة في المسألة، وهو ثمن الزبد اللي الراجل اشتراه.

نيجي للخطوة التانية، وهي إيجاد ثمن الجبن. ثمن الجبن بيساوي المبلغ الكلّي المدفوع ناقص ثمن الزبد. المبلغ الكلّي اللي الراجل دفعه هو ألف ميتين وواحد وخمسة من مية جنيه. هنشيل منه تمن الزبد اللي إحنا لسّه جايبينه، اللي هو ربعمية تسعة وستين واتنين من عشرة جنيه، ونطرح. ناتج الطرح هيكون سبعمية واحد وتلاتين وخمسة وتمانين من مية جنيه. وده هو تمن الجبنة اللي الراجل اشتراها. كده نكون خلّصنا الخطوة التانية.

نيجي للخطوة التالتة والأخيرة، وهي إيجاد ثمن الكيلوجرام الواحد من الجبن. علشان نوجد ثمن الكيلوجرام الواحد من الجبن، هنقول: ثمن الكيلوجرام الواحد يساوي ثمن الجُبن الكلّي على عدد الكيلوجرامات. وإحنا جِبنا ثمن الجُبن الكلّي سبعمية واحد وتلاتين وخمسة وتمانين من مية جنيه. وعدد الكيلوجرامات من الجبن عندنا في رأس المسألة أربعتاشر وتمنمية خمسة وسبعين من ألف كيلوجرام. ناتج القسمة هيكون تسعة وأربعين وعشرين من مية جنيهًا.

وهو ده ثمن الكيلوجرام الواحد من الجبن، والمطلوب في المسألة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.