فيديو: إيجاد مساحة المربع

مربع طول ضلعه ٣٫١ سم. أوجد مساحة المربع، لأقرب جزء من عشرة.

٠٢:١٨

‏نسخة الفيديو النصية

مربع طول ضلعه تلاتة وواحد من عشرة سنتيمتر. أوجد مساحة المربع لأقرب جزء من عشرة.

العلاقة اللي بنحسب منها مساحة المربع هي إن مساحته بتبقى حاصل ضرب طول الضلع في نفسه، يعني طول الضلع في طول الضلع.

المربع اللي عندنا طول ضلعه تلاتة وواحد من عشرة سنتيمتر، فمساحته هتبقى حاصل ضرب طول الضلع اللي هو تلاتة وواحد من عشرة، في نفسه يعني في تلاتة وواحد من عشرة، لو جينا نضرب العددين دول في بعض هنتجاهل العلامة العشرية، وبعدين لمّا نحصل على الناتج هنحط العلامة العشرية بعد رقمين من جهة اليمين.

دلوقتي هنبتدي نضرب واحد في واحد، حاصل الضرب هيبقى واحد. وبعدين نضرب واحد في تلاتة، هيبقى حاصل الضرب بيساوي تلاتة. دلوقتي نبتدي نضرب تلاتة في واحد ونبدأ نحط الناتج في خانة العشرات، وبعدين نضرب تلاتة في تلاتة والناتج هيبقى في خانة المئات، هنجمع بقى، واحد هينزل زي ما هو، تلاتة زائد تلاتة ستة، وتسعة هتنزل زي ما هي. كان عندنا علامة عشرية بعد رقم واحد في العدد الأول وبعد رقم واحد في العدد التاني؛ فالناتج اللي حصلنا عليه هنحط فيه العلامة العشرية بعد رقمين من جهة اليمين.

يبقى الناتج المفروض يبقى تسعة وواحد وستين من مية. بس إحنا مطلوب مننا نقرب الناتج لأقرب جزء من عشرة، خانة الجزء من عشرة اللي هي دي، لمّا بنيجي نقرب للخانة دي بنبص على يمينها، الرقم اللي موجود على يمينها اللي هو واحد أقل من الخمسة؛ فبالتالي الرقم اللي في خانة الأجزاء من عشرة هيفضل زي ما هو مش هيتغير، واللي على يمينه هيصبح صفر؛ فبعد التقريب هيبقى العدد ده تسعة وستة من عشرة.

يبقى مساحة المربع هتساوي تقريبًا تسعة وستة من عشرة سنتيمتر مربع. ما ننساش إن وحدات المساحة بتبقى وحدات مربعة، بما إن الطول عندنا وحدة قياسه كانت السنتيمتر؛ فوحدة قياس المساحة في الحالة دي بتبقى سنتيمتر مربع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.