فيديو: مقارنة معدلات إنتاج كميات معطاة والأزمنة المُستغرَقة

يُنتِج المصنع أ ٣٠٠‎٠ قطعة صابون خلال ٢/١ ٧ ساعات. يُنتِج المصنع ب ٥٥٠‎٠ قطعة صابون من النوع نفسه خلال ٢/١ ٢ ساعة. أيُّ مصنع يُنتِج قطع صابون أكثر في الساعة؟

٠٣:٢٨

‏نسخة الفيديو النصية

ينتج المصنع أ تلات آلاف قطعة صابون، خلال سبعة ونص ساعات. ينتج المصنع ب خمس آلاف وخمسمية قطعة صابون من النوع نفسه، خلال اتنين ونص ساعة. أيّ مصنع ينتج قطع صابون أكثر في الساعة؟

يعني معطى عندنا إن فيه مصنعين بينتجوا صابون. اللي هم المصنع أ، والمصنع ب. بعد كده معطى عندنا إن معدل إنتاج المصنع أ … واللي هو بيساوي عدد قطع الصابون، مقسوم على عدد الساعات. فمعطى عندنا في السؤال إن المصنع أ بينتج تلات آلاف قطعة صابون. فبالتالي هيبقى عدد قطع الصابون هو تلات آلاف. وأمّا عدد الساعات، فمعطى عندنا في السؤال، واللي هو سبعة ونص. فنقدر نكتب سبعة ونص، في صورة عدد عشري. واللي هتبقى سبعة وخمسة من عشرة.

فبالتالي هيبقى معدل الإنتاج بيساوي تلات آلاف على سبعة وخمسة من عشرة. فلمّا نحسبها هتبقى بتساوي ربعمية. وبالتالي هيبقى معدل إنتاج المصنع أ، بيساوي ربعمية. وربعمية معناها إن المصنع بينتج ربعمائة قطعة صابون لكل ساعة. يعني كل ساعة، بينتج المصنع ربعمية قطعة صابون. فده كده هيبقى معدل إنتاج المصنع أ.

وبنفس الطريقة هنوجد معدل الإنتاج للمصنع ب. فبرضو هيبقى معدل الإنتاج بيساوي عدد قطع الصابون، مقسوم على عدد الساعات. ومعطى عندنا إن المصنع ب بينتج خمس آلاف وخمسمية قطع من الصابون. فبالتالي هنعوّض عن عدد قطع الصابون، بخمس آلاف وخمسمية. وأمّا عدد الساعات، فمعطى عندنا إن المصنع ب، بينتج خمس آلاف وخمسمية قطع من الصابون، خلال اتنين ونص ساعة. فمعنى كده إننا هنعوّض عن عدد الساعات باتنين ونص. ونقدر نكتبها في صورة عدد عشري، واللي هي اتنين وخمسة من عشرة.

بعد كده عشان نوجد معدل الإنتاج، يعني عايزين نشوف المصنع ب بينتج كام قطعة من الصابون، في الساعة الواحدة. يبقى هنقسم خمس آلاف وخمسمية، على اتنين وخمسة من عشرة. فلمّا نحسبها هتبقى بتساوي ألفين وميتين. يعني معنى كده إن المصنع ب بينتج ألفين وميتين قطعة من الصابون، لكل ساعة. وبالتالي هيبقى معدل إنتاج المصنع ب، هو ألفين وميتين. يعني هو ده العدد اللي بينتجه المصنع في الساعة الواحدة.

بعد كده لمّا نيجي نشوف السؤال، فهنلاحظ إن المطلوب عندنا: أيّ مصنع ينتج قطع صابون أكثر في الساعة؟ يعني عايزين نشوف أنهي مصنع اللي معدل إنتاجه أكبر. فلمّا نيجي نشوف المصنع أ، معدل إنتاجه ربعمية قطعة في الساعة. وأمّا المصنع ب، فمعدل إنتاجه هو ألفين وميتين قطعة في الساعة. فبما إن معدل إنتاج المصنع ب، أكبر من معدل إنتاج المصنع أ. فمعنى كده إن المصنع ب هو اللي بينتج قطع صابون أكتر في الساعة. وبالتالي هتبقى إجابة السؤال هي: المصنع ب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.