تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تطبيقات على إيجاد محيط المربع والمستطيل

سوزان فائق

يوضح الفيديو محيط المربع، ومحيط المستطيل، وتطبيقات حياتية عليهما.

٠٥:٣٠

‏نسخة الفيديو النصية

هنتكلم في الفيديو ده عن تطبيقات على إيجاد محيط المربع والمستطيل من أمثلة في حياتنا العملية. هنعرف يعني إيه محيط المربع، ويعني إيه محيط المستطيل، وإزاي بنحسبهم. وهنتكلم على أمثلة من حياتنا.

أول حاجة هنعرف إيه هو المحيط، هو طول الخط حول الشكل المغلق. ولإيجاد محيط المربع بنجمع أطوال أضلاعه كلها، وبما إن أطوال أضلاع المربع متساوية؛ فإن محيط المربع هيساوي حاصل ضرب طول ضلعه في أربعة؛ يعني في المربع اللي قدامنا ده طول ضلعه تلتاشر سنتيمتر، مجموع أطوال أضلاعه هي المحيط، اللي هيساوي اتنين وخمسين سنتيمتر.

ولإيجاد محيط مستطيل بنجمع أطوال أضلاعه كلها، يبقى محيط المستطيل هيساوي ضعف الطول مضافًا عليه ضعف العرض؛ يعني زي ما إحنا شايفين كده، المستطيل اللي طوله حداشر سنتيمتر وعرضه أربعة سنتيمتر، يبقى محيطه هيبقى ضعف الطول، اللي هو اتنين في حداشر، مضافًا عليه ضعف العرض، اللي هو اتنين في أربعة؛ يعني هيساوي تلاتين سنتيمتر. يبقى معنى كده إن محيط المربع هيساوي أربعة في طول ضلعه، ومحيط المستطيل هيساوي اتنين في، الطول زائد العرض.

نحل أمثلة من حياتنا العملية، في ملعب الكرة الطائرة، شكل الملعب من إحدى نصفيه عند الشبكة عبارة عن مربع طول ضلعه تسعة متر، اوجد محيط نصف ملعب الكرة الطائرة.

هنا مُعطى طول ضلع المربع، وبما إن محيط المربع بيساوي أربعة في طول ضلعه، يبقى محيط نصف ملعب الكرة الطائرة، اللي هو بيمثل محيط المربع، اللي هو طول ضلعه تسعة متر، يبقى أربعة في تسعة هيساوي ستة وتلاتين متر. والمحيط وحدته هي وحدة طول، اللي هي المتر.

هناخد مثال كمان، ما عدد سنتيمترات الخشب المطلوبة لعمل إطار لصورة مقاسها أربعين سنتيمتر في ستة وستين سنتيمتر.

هنا مِدّي أربعين في ستة وستين، معناه إن هو على شكل مستطيل. يبقى محيط المستطيل، اللي هو هيمثل إطار الصورة، هيساوي اتنين في، الطول زائد العرض؛ يبقى اتنين في الطول ستة وستين زائد العرض أربعين، يبقى هيساوي اتنين في مية وستة هيساوي ميتين واتناشر سنتيمتر، وهو ده عدد السنتيمترات من الخشب المطلوبة لعمل الإطار.

هناخد مثال كمان، قطعة أرض مستطيلة، بعداها تمنية وستين متر وتلاتة وأربعين متر، محاطة بسياج، تحتوي قطعة الأرض على ملعب مربع الشكل طول ضلعه تلتاشر متر، محاط أيضًا بسياج. اوجد طول السياج الذي يحيط بقطعة الأرض والملعب.

زي ما إحنا شايفين كده قطعة الأرض المستطيلة بره دي في بعداها تمنية وستين متر وتلاتة وأربعين متر، والملعب اللي جوه الأرض طول ضلعه تلتاشر متر. عشان نِوجد طول السياج اللي يحيط بقطعة الأرض، هي قطعة الأرض على شكل مستطيل، يبقى هنِوجد محيط المستطيل، وبعدين نِوجد طول السياج المحيط بالملعب، واللي هو على شكل مربع. يبقى هنِوجد هنا محيط المربع. محيط المستطيل هيساوي اتنين في، الطول زائد العرض، يبقى طول السياج الذي يحيط بقطعة الأرض، اللي هو محيط المستطيل، هيساوي اتنين في، الطول زائد العرض، يبقى اتنين في مية وحداشر هيساوي ميتين اتنين وعشرين متر. بعد كده هنِوجد السياج المحيط بالملعب، يبقى هنِوجد محيط المربع؛ لأن الملعب على شكل مربع، يبقى طول السياج الذي يحيط بالملعب هيساوي أربعة في طول ضلعه، اللي هو تلتاشر متر، هيساوي اتنين وخمسين متر، يبقى طول السياج الذي يحيط بقطعة الأرض والملعب هيساوي ميتين اتنين وعشرين زائد اتنين وخمسين، اللي هو طول السياج اللي يحيط بقطعة الأرض. وطول السياج اللي بيحيط بالملعب هيساوي ميتين أربعة وسبعين متر، وهي دي القيمة المطلوبة.

في الفيديو ده اتكلمنا عن تطبيقات على محيط المربع ومحيط المستطيل، عرفنا يعني إيه محيط، وإزاي نِوجد قيمة محيط المربع، وقيمة محيط المستطيل، واتكلمنا على أمثلة من حياتنا العملية.