تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: عرض وتحليل البيانات باستخدام مخطَّط الساق والورقة

أحمد مدحت

يوضح الفيديو كيفية عرض البيانات وتحليلها باستخدام مخطّط الساق والورقة، مع أمثلة توضيحية.

٠٥:٣٨

‏نسخة الفيديو النصية

هنتكلّم عن عرض وتحليل البيانات باستخدام مخطّط الساق والورقة.

هدفنا في الفيديو ده، إن إحنا نعرف إزّاي نعرض مجموعة من البيانات باستخدام مخطّط الساق والورقة. وكمان نعرف إزّاي نحلّل البيانات، لو عندنا مخطّط الساق والورقة.

بالنسبة لمخطّط الساق والورقة، فإحنا بنستخدمه علشان ننظّم مجموعات البيانات الكبيرة. وده بيخلّي تفسير البيانات دي وتحليلها أسهل. وعلشان نعمل مخطّط الساق والورقة لمجموعة من البيانات، بنحتاج إن إحنا نرتّب البيانات اللي عندنا من الأصغر للأكبر. وبعد كده بننظّمها من خلال القيمة المكانية.

هنبدأ بمثال، نعرف من خلاله إزّاي نعرض مجموعة من البيانات باستخدام مخطّط الساق والورقة. عندنا في المثال جدول. الجدول ده بيحتوي على بيانات عبارة عن عدد الرسائل النصّية اللي أرسلها شخص ما يوميًّا لمدة واحد وعشرين يوم. ومطلوب عرض البيانات دي باستخدام مخطّط الساق والورقة.

أول خطوة هنعملها، إن إحنا هنرتّب البيانات اللي في الجدول اللي عندنا من الأصغر للأكبر، زيّ ما هيظهر لنا. وبعد ما هنرتّب البيانات من الأصغر للأكبر، هنرسم خطّ رأسي زيّ ما هيظهر لنا. بعد كده، هنكتب على شمال الخطّ الرأسي ده السيقان. والسيقان دي هتبقى عبارة عن الأرقام اللي موجودة في خانة العشرات للأعداد بتاعة مجموعة البيانات اللي عندنا.

فلمّا هنرجع لمجموعة البيانات اللي عندنا، هنلاقي أصغر عدد هو اتنين، والرقم اللي موجود في خانة العشرات بتاعته هو صفر. أمَّا أكبر عدد، فهو خمسة وأربعين. والرقم اللي موجود في خانة العشرات بتاعته هو أربعة. معنى كده إن السيقان هتبقى صفر، وواحد، واتنين، وتلاتة، وأربعة. فهنكتب السيقان من الصغيّر للكبير على شمال الخطّ الرأسي، زيّ ما هيظهر لنا. بعد كده هنكتب على يمين الخطّ الرأسي الأوراق. والأوراق دي هتبقى هي الأرقام اللي موجودة في خانة الآحاد.

بعد كده لمّا هنكتب الأوراق، هنكتب الورقة بتاعة عدد معيّن في نفس الصفّ بتاع الساق بتاع نفس العدد. وهنراعي وإحنا بنكتب الأوراق الترتيب بتاع البيانات من الأصغر للأكبر، اللي إحنا عملناه. فبالنسبة لأصغر عدد، واللي هنبدأ بيه، هو اتنين. فبالنسبة للعدد اتنين، واللي هو أول عدد في الترتيب من الأصغر للأكبر، هنلاقي الساق بتاعته هي صفر. وبالتالي لمّا هنكتب الورقة، هنكتبها في الصفّ بتاع الساق صفر. فبالنسبة للورقة بتاعة العدد اتنين، واللي تُعتبَر هي الرقم اللي موجود في خانة الآحاد، فهتبقى اتنين. فهنكتب الورقة بتاعة العدد اتنين.

بعد كده، تلاتة الساق بتاعته هي صفر. أمَّا الورقة، فهي تلاتة. بعد كده، خمسة الساق بتاعته هي صفر. أمَّا الورقة، فهي خمسة، وهكذا. فهنكمّل المخطّط بنفس الطريقة، زيّ ما هيظهر لنا. بكده بعد ما كمّلنا المخطّط، بقت خانة العشرات للأعداد اللي موجودة في مجموعة البيانات اللي عندنا بتمثّل السيقان. أمَّا خانة الآحاد، فبتمثّل الأوراق.

وعلشان نعرف نقرا البيانات اللي إحنا نظّمناها في المخطّط، هنعمل مفتاح للمخطّط ده، يوضّح لنا إزّاي نقرا البيانات. زيّ مثلًا المفتاح اللي هيظهر لنا. في المفتاح ده، هنلاقي خطّ رأسي. وهو عبارة عن الخطّ الرأسي اللي بيفصل بين السيقان والأوراق. واللي موجود على شمال الخطّ بيبقى ساق. واللي موجود على يمين الخطّ هو ورقة. وبما إن السيقان بتمثّل خانة العشرات، أمَّا الأوراق، فبتمثّل خانة الآحاد. فالعدد اللي عندنا آحاده هو سبعة، وعشراته هو اتنين. يعني هيبقى سبعة وعشرين. والسبعة وعشرين دي هتمثّل عدد الرسائل النصّية.

بكده بعد ما عملنا المخطّط، وعملنا كمان مفتاح ليه، هنكتب عنوان المخطّط. والعنوان هيبقى عدد الرسائل النصّية المرسلة يوميًّا لمدة واحد وعشرين يوم. وبكده يبقى إحنا أنشأنا مخطّط الساق والورقة للبيانات اللي موجودة عندنا في الجدول.

من خلال المثال ده، هنلاحظ إن مخطّط الساق والورقة بيعرض كلّ القيم اللي موجودة في البيانات. ومن ضمنها أصغر قيمة وأكبر قيمة. وده مفيد في تحليل البيانات.

فهنوضّح من خلال مثال إزّاي نحلّل البيانات لو عندنا مخطّط الساق والورقة. عندنا في المثال مخطّط الساق والورقة بيوضّح الارتفاع التقريبي لأطول عشرين شلّال في العالم. ومطلوب إننا نحلّل البيانات اللي معروضة في المخطّط اللي عندنا.

علشان نحلّل البيانات اللي في المخطّط اللي عندنا، محتاجين نعرف نقرا المخطّط. وعلشان نعرف نقرا المخطّط، فهنشوف المفتاح بتاع المخطّط، واللي هو ده. فهنلاقي من خلال المفتاح اللي عندنا إن الساق بتمثّل الرقم اللي موجود في خانة المئات. أمَّا بالنسبة للورقة، فهتمثّل الرقم اللي موجود في خانة العشرات. أمَّا الآحاد بتاع العدد، فهيبقى صفر. معنى كده إن هيبقى ارتفاع الشلّال اللي الساق بتاعته هي خمسة والورقة بتاعته هي ستة، هو خمسمية وستين متر.

بكده بعد ما عرفنا نقرا المخطّط، نقدر بكلّ سهولة إن إحنا نحدّد الارتفاع التقريبي لأطول شلَّال في العالم. فعلشان نحدّد الارتفاع ده، هنلاقي إن أكبر ساق هي تسعة، وأكبر ورقة مناظرة للساق دي هي تمنية. معنى كده إن هيبقى أطول شلّال في العالم ارتفاعه التقريبي هو تسعمية وتمانين متر. كمان هنلاقي إن فيه عشر شلّالات ما بيقلّش ارتفاعهم التقريبي عن ستمية وعشرة متر. معنى كده إن نصّ الشلالات ما بيقلّش ارتفاعها التقريبي عن ستمية وعشرة متر.

بكده يبقى إحنا في الفيديو ده، عرفنا إن إحنا بنستخدم مخطّط الساق والورقة؛ علشان ننظّم مجموعة كبيرة من البيانات. وده علشان نخلّي تحليل وتفسير البيانات دي أسهل. وعرفنا إن إحنا بنرتّب مجموعة البيانات دي من الأصغر للأكبر. بعد كده بيتمّ تنظيمها من خلال القيمة المكانية.