فيديو: القسمة على ۱۱ و۱۲

يوضح الفيديو شرح القسمة على ۱۱ و۱۲، وشرح الطرق المختلفة لإيجاد ناتج القسمة، مع حل أمثلة توضيحية.

٠٩:٢٤

‏نسخة الفيديو النصية

القسمة على حداشر واتناشر.

في الفيديو ده، هنشرح إزاي نقدر نقسم على حداشر واتناشر، باستخدام طرق القسمة المختلفة، مع حلّ أمثلة توضيحية.

نبدأ أول حاجة بحلّ مثال. بنقرا المثال: يتواجد تلاتة وتلاتين طالب داخل معمل به حداشر تجربة في العلوم. ويتمّ توزيع الطلبة بالتساوي على التجارب. اكتب جملة عددية تبيّن عدد الطلبة في كلّ تجربة.

يبقى عندنا تلاتة وتلاتين طالب. ده العدد الكلّي للطلبة. عاوزين نوزّعهم على حداشر تجربة بالتساوي. هنكتب المطلوب رياضيًّا. المطلوب هو ناتج قسمة تلاتة وتلاتين على الحداشر. أو بصورة أخرى، بنكتب تلاتة وتلاتين مقسومة على حداشر. هيكون الناتج كام؟

هنوجد ناتج القسمة باستخدام طريقة المجموعات المتساوية. بنقسّم الطلبة إلى حداشر مجموعة بالتساوي، زيّ ما إحنا شايفين كده. عندنا حداشر مجموعة، كلّ مجموعة بتحتوي على نفس عدد الطلبة. فبنلاقي إن كل مجموعة بتحتوي على واحد، اتنين، تلاتة. يعني على تلاتة طلبة. إذن تلاتة وتلاتين على الحداشر بيكون الناتج تلاتة. أو بنقول: تلاتة وتلاتين مقسوم على حداشر، الناتج بتلاتة.

هنستخدم طريقة أخرى لإيجاد ناتج القسمة ده. وهي طريقة الطرح المتكرّر. باستخدام طريقة الطرح المتكرّر، بنبدأ نطرح المقسوم من المقسوم عليه أكتر من مرة حتى نصل إلى الصفر. فبنبدأ أول عملية طرح. تلاتة وتلاتين ناقص حداشر، الناتج اتنين وعشرين. بنكتب واحد، يعني أول عملية طرح. بنكمّل؛ اتنين وعشرين ناقص حداشر بيكون الناتج حداشر. يبقى دي تاني عملية طرح. بعد كده حداشر ناقص حداشر بيكون الناتج صفر. ودي عبارة عن تالت عملية طرح.

إذن تلاتة وتلاتين على الحداشر بيكون الناتج تلاتة. وبكده نقدر نقول: أي أن كل تجربة يكون بها تلات طلاب. ممكن نتأكّد من الناتج ده باستخدام الضرب. وده عن طريق إننا نحسب عدد الطلبة الكلّي، من خلال النتيجة اللي إحنا عرفناها. بنتحقّق بالضرب عن طريق ضرب تلاتة في حداشر. تلاتة هي عبارة عن عدد الطلبة في كلّ تجربة. وحداشر عدد التجارب. وبكده بيكون عدد الطلبة الكلّي تلاتة وتلاتين طالب. بنلاقي إن فعلًا عدد الطلبة الكلّي تلاتة وتلاتين طالب. وبكده بيكون ناتج القسمة بتاعنا، اللي هو عبارة عن تلاتة، مظبوط.

هنكمّل، ونحلّ مثال آخر. نفتح صفحة جديدة. بنقرا المثال التالي: يريد أحمد وضع ستين بيضة في علب. وكانت كل علبة تتّسع إلى اتناشر بيضة. كم علبة يحتاجها أحمد؟

يبقى المطلوب مننا نوزّع الستين بيضة على علب، بحيث إن كل علبة تحتوي على اتناشر بيضة. يبقى المطلوب هو إيجاد ناتج قسمة ستين على اتناشر، أو ستين مقسومة على اتناشر. ستين عبارة عن عدد البيض الكلّي، واتناشر عبارة عن عدد البيض اللي هيتحطّ داخل كلّ علبة. وناتج القسمة بيعبّر عن عدد العلب اللي بيحتاجها أحمد.

بعد كده، لإيجاد ناتج القسمة، هنستخدم طريقة المجموعات المتساوية. باستخدام طريقة المجموعات المتساوية، لازم نقسّم الستين بيضة إلى مجموعات متساوية. ولكن كل مجموعة لازم تحتوي على اتناشر بيضة. فبنبدأ نوزّع اتناشر بيضة على كلّ علبة، زيّ ما إحنا شايفين كده. في الآخر بنعدّ عدد العلب، بنلاقي واحد، اتنين، تلاتة، أربعة، خمسة. إذن ستين على اتناشر بيكون الناتج خمسة. أو بنقول: ستين مقسومة على اتناشر، الناتج خمسة. أي أن أحمد يحتاج إلى خمس علب لتعبئة البيض.

لازم ناخد بالنا من حاجة هنا. لمّا جينا نقسم ستين على اتناشر، واستخدمنا طريقة المجموعات المتساوية لإيجاد ناتج القسمة. بنستخدم طريقة المجموعات المتساوية بطريقتين هنا. يا إمّا نقسم الستين بيضة إلى اتناشر مجموعة، أو نقسم الستين بيضة إلى مجاميع، كل مجموعة بتحتوي على اتناشر. والحالة التانية دي هي اللي عندنا في المثال بتاعنا؛ إن إحنا عاوزين نقسّم الستين بيضة إلى مجاميع؛ لأن كل علبة لازم تحتوي على اتناشر بيضة. لكن في كلا الحالتين ناتج القسمة هيكون واحد. وهو عبارة عن خمسة.

بعد كده هنحلّ مثال آخر؛ لإيجاد ناتج القسمة على اتناشر باستخدام حقائق الضرب المترابطة. نكمّل، ونفتح صفحة جديدة. بنقرا المثال التالي: اوجد تمنية وأربعين على اتناشر، أو تمنية وأربعين مقسومة على اتناشر.

باستخدام حقائق الضرب المترابطة. لازم نكون حافظين جدول الضرب؛ عشان نستخدم الطريقة دي. مطلوب مننا نوجد تمنية وأربعين على الاتناشر بيكون الناتج كام. فباستخدام علاقة الضرب بالقسمة، بنسأل: اتناشر في كام بيكون الناتج تمنية وأربعين؟ من حفظنا، اتناشر في أربعة بيكون الناتج تمنية وأربعين. يبقى ناتج قسمة تمنية وأربعين على الاتناشر، الناتج عبارة عن أربعة. إذن تمنية وأربعين على الاتناشر ناتج القسمة أربعة. أو بنقول: تمنية وأربعين مقسومة على الاتناشر بيكون الناتج أربعة.

بعد كده هنحلّ مثال للقسمة على اتناشر، باستخدام كل الطرق اللي اتكلّمنا عنها وشرحناها. نفتح صفحة جديدة. بنقرا المثال التالي: اوجد اتنين وعشرين على حداشر، أو اتنين وعشرين مقسومة على حداشر. أول طريقة هنستخدمها هي طريقة المجموعات المتساوية.

هنبدأ نوجد ناتج قسمة اتنين وعشرين على حداشر. وده بإننا أول حاجة يا إمّا نوزّع اتنين وعشرين إلى حداشر مجموعة، ونعدّ عناصر كل مجموعة. طبعًا الحداشر مجموعة هيكونوا متساويين. بنقسّم الاتنين وعشرين إلى حداشر مجموعة، حداشر مجموعة متساوية. يعني بداخل كلّ مجموعة نفس العدد من العناصر، زيّ ما إحنا شايفين كده. بنعدّ بعد كده عناصر كل مجموعة، بنلاقي إن المجموعة بتحتوي على واحد، اتنين من العناصر.

أو بطريقة أخرى، باستخدام المجموعات المتساوية. بنقسّم الاتنين وعشرين، وهي المقسوم، إلى مجموعات كل مجموعة بتحتوي على حداشر عنصر، زيّ ما إحنا شايفين. واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر. بنلاقي إن الاتنين وعشرين اتقسّمت إلى مجموعتين؛ واحد، اتنين. وداخل كل مجموعة حداشر عنصر، زيّ ما عدّينا. إذن باستخدام المجموعات المتساوية، سواء بالطريقة الأولى اللي قلناها أو بالطريقة التانية، إذن اتنين وعشرين على حداشر بيكون الناتج اتنين. أو اتنين وعشرين مقسومة على حداشر، الناتج اتنين.

بعد كده هنستخدم طريقة الطرح المتكرّر. باستخدام الطرح المتكرر، هنوجد ناتج قسمة اتنين وعشرين على الحداشر. هنبدأ أول حاجة نطرح اتنين وعشرين ناقص حداشر. يعني المقسوم ناقص المقسوم عليه بيكون الناتج حداشر. ودي عبارة عن أول عملية طرح. بعد كده بنطرح حداشر، وهي ناتج أول عملية طرح، ناقص المقسوم عليه، بيكون الناتج صفر. ودي عبارة عن تاني عملية طرح. وبكده يبقى طرحنا حداشر مرتين من المقسوم حتى نصل إلى الصفر. إذن اتنين وعشرين على حداشر، ناتج القسمة اتنين.

بعد كده هنستخدم طريقة حقائق الضرب المترابطة؛ لإيجاد ناتج هذه القسمة. باستخدام حقائق الضرب المترابطة، مطلوب إيجاد ناتج قسمة اتنين وعشرين على الحداشر. لازم نكون حافظين جدول الضرب. فباستخدام علاقة الضرب بالقسمة، بنسأل: حداشر نضربها في كام، بيكون الناتج اتنين وعشرين؟ من حفظنا لجدول الضرب، هنلاقي إن حداشر في اتنين بيكون الناتج اتنين وعشرين. يبقى ناتج قسمة اتنين وعشرين على حداشر عبارة عن اتنين. لازم نقول ملحوظة أخيرة: استخدام حقائق الضرب المترابطة بتكون أحسن الطرق لمّا يكون المقسوم عبارة عن رقم كبير.

يبقى في الفيديو ده، شرحنا القسمة على حداشر واتناشر. واستخدمنا الطرق المختلفة لإيجاد ناتج القسمة؛ طريقة المجموعات المتساوية، طريقة الطرح المتكرّر، طريقة حقائق الضرب المترابطة. وحلّينا أمثلة توضيحية توضّح لنا كيفية استخدام الطرق دي.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.