فيديو: مقارنة الزوايا في مثلثين

أكمل باستخدام< أو = أو >: ق∠ﻫدﺃ _ ق∠ﺃﺟﺏ.

٠٤:١٤

‏نسخة الفيديو النصية

أكمل باستخدام أقل من، أو يساوي، أو أكبر من. قياس زاوية ﻫ د أ، نقط، قياس زاوية أ ج ب.

عندنا في المثال شكل، هنستخدم المعلومات الموضَّحة فيه؛ علشان نقارن بين قياس زاوية ﻫ د أ، وقياس زاوية أ ج ب. أول حاجة، هنوجد قياس زاوية أ ج ب. في المثلث أ ب ج، بما إن مجموع قياسات الزوايا الداخلية للمثلث تساوي مية وتمانين درجة. فمعنى كده إن هيبقى قياس زاوية أ ج ب، زائد قياس زاوية أ ب ج، زائد قياس زاوية ب أ ج، يساوي مية وتمانين درجة.

ومن خلال الشكل اللي عندنا، هنلاقي قياس زاوية أ ب ج يساوي تسعة وعشرين درجة. وقياس زاوية ب أ ج يساوي تلاتين درجة. فلمّا هنعوّض بقياس زاوية أ ب ج، وقياس زاوية ب أ ج، في المعادلة اللي عندنا. هيبقى قياس زاوية أ ج ب، زائد تسعة وعشرين درجة، زائد تلاتين درجة، يساوي مية وتمانين درجة. وتسعة وعشرين درجة زائد تلاتين درجة، يساوي تسعة وخمسين درجة. فبالتالي هيبقى قياس زاوية أ ج ب زائد تسعة وخمسين درجة، يساوي مية وتمانين درجة.

بعد كده علشان نوجد قياس زاوية أ ج ب، هنطرح من طرفَي المعادلة تسعة وخمسين درجة. فهيبقى عندنا قياس زاوية أ ج ب، يساوي مية واحد وعشرين درجة. كده يبقى إحنا أوجدنا قياس زاوية أ ج ب، وهو يساوي مية واحد وعشرين درجة. بعد كده هنبدأ نوجد قياس زاوية ﻫ د أ.

في الشكل اللي عندنا، هنلاقي إن الزاوية ب ج د زاوية مستقيمة. وبتتكوّن من زاوية أ ج د، وزاوية أ ج ب. وبما إن قياس الزاوية المستقيمة، يساوي مية وتمانين درجة. فمعنى كده إن هيبقى قياس زاوية أ ج د، زائد قياس زاوية أ ج ب، يساوي مية وتمانين درجة. وبما إن قياس زاوية أ ج ب، يساوي مية واحد وعشرين درجة. فلمّا هنعوّض في المعادلة اللي عندنا، هنلاقي قياس زاوية أ ج د زائد مية واحد وعشرين درجة، يساوي مية وتمانين درجة. وعلشان نوجد قياس زاوية أ ج د، هنطرح من طرفَي المعادلة مية واحد وعشرين درجة. فلمّا هنطرح، هيبقى عندنا قياس زاوية أ ج د، يساوي تسعة وخمسين درجة.

بعد كده بالنسبة لزاوية ﻫ د أ. وزاوية ﻫ د أ زاوية خارجية عن المثلث أ ج د. وبما إن قياس الزاوية الخارجية في المثلث، يساوي مجموع قياسَي الزاويتين الداخليتين. البعيدتين عنها، أو الغير مجاورتين لها. فهيبقى قياس زاوية ﻫ د أ، يساوي قياس زاوية ج أ د زائد قياس زاوية أ ج د. ومن خلال الشكل اللي عندنا، هنلاقي قياس زاوية ج أ د يساوي سبعة وستين درجة. أمّا قياس زاوية أ ج د، فهو يساوي تسعة وخمسين درجة.

فلمّا هنعوّض عن قياس زاوية ج أ د، وقياس زاوية أ ج د، في المعادلة اللي عندنا. هيبقى قياس زاوية ﻫ د أ يساوي سبعة وستين درجة، زائد تسعة وخمسين درجة. وسبعة وستين درجة زائد تسعة وخمسين درجة، يساوي مية ستة وعشرين درجة. فهيبقى قياس زاوية ﻫ د أ، يساوي مية ستة وعشرين درجة.

كده إحنا أوجدنا قياس زاوية ﻫ د أ، وهو مية ستة وعشرين درجة. وبكده بعد ما أوجدنا قياس زاوية ﻫ د أ، وقياس زاوية أ ج ب؛ نقدر نقارن ما بينهم. فهنلاقي إن قياس زاوية ﻫ د أ، يساوي مية ستة وعشرين درجة. أمّا قياس زاوية أ ج ب يساوي مية واحد وعشرين درجة. وده معناه إن قياس زاوية ﻫ د أ، أكبر من قياس زاوية أ ج ب.

بكده يبقى إحنا قارنّا بين قياس زاوية ﻫ د أ، وقياس زاوية أ ج ب. فهنكمل مكان النقط اللي عندنا، وهنكتب علامة أكبر من. وهو ده المطلوب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.