فيديو: الضرب في ٤

يوضح الفيديو ما الضرب، وكيفية ضرب الأعداد في ٤ باستخدام النماذج والرسم، وأمثلةً عليها.

٠٣:٢٤

‏نسخة الفيديو النصية

دلوقتي هنتكلم عن الضرب في أربعة.

هنتعلم إزاي نجيب ناتج الضرب في العدد أربعة. هنلاحظ إن الضرب هو عملية على عددين، يمكن وصفها بأنها جمع متكرر، والإشارة دي معناها الضرب.

هبتدي الشرح بالمثال التالي: تحمل شاحنة خمس سيارات، إذا كان للسيارة الواحدة أربع عجلات، فكم عجلة للسيارات الخمس.

عشان أجيب ناتج الضرب في العدد أربعة، ممكن أستعمل طريقة من الطريقتين؛ الطريقة الأولى: باستعمال النماذج. والطريقة التانية: باستعمال الرسم.

في الطريقة الأولى هرسم خمس مجموعات زي ما هو موضح قدامي. في كل مجموعة أربع قطع عَدّ. وبكده أقدر أقول إن عندي خمس مجموعات، في كلٍّ منها أربع قطع؛ يعني الناتج هيساوي عشرين. يعني أقدر أقول إنه الخمس سيارات عندهم عشرين عجلة.

الطريقة التانية باستعمال الرسم. هستعمل الجمع المتكرر؛ عشان أجيب ناتج ضرب أربعة في خمسة. هأرسم خمس سيارات، لكل سيارة أربع عجلات. وبكده أقدر أقول إنه عدد العجلات في السيارات كلها هو أربعة، زائد أربعة، زائد أربعة، زائد أربعة، زائد أربعة. يعني هيساوي عشرين. وبكده أقدر أقول إن جملة الضرب هي خمسة في أربعة هتساوي عشرين. يعني عدد العجلات في السيارات الخمس هو عشرين عجلة.

هنكمل في الصفحة اللي جاية.

تدريبات: أوجد ناتج الضرب مستعملًا الشبكة أو الرسم.

رقم واحد: أربعة في أربعة.

عشان أجيب ناتج ضرب أربعة في أربعة، هأرسم أربع مجموعات، زي ما هو موضح قدامي. في كل مجموعة أربع قطع. وبكده أقدر أقول إنه ناتج ضرب أربعة في أربعة، بعد ما أعدّ القطع كلها، هلاقي ستاشر. يعني أربعة في أربعة هيساوي ستاشر.

رقم اتنين: سبعة في أربعة.

عشان أجيب ناتج ضرب سبعة في أربعة، هأرسم سبع مجموعات، وفي كل مجموعة أربع قطع، زي ما هو موضح قدامي. يعني ناتج ضرب سبعة في أربعة هيساوي تمنية وعشرين.

رقم تلاتة: قرأ خالد تمن كتب، إذا كان كل كتاب بيتكوّن من أربع فصول، فما عدد الفصول اللي قراها خالد؟

هأرسم تمن كتب زي ما هو موضح قدامي، وتحت كل الكتاب هكتب أربعة، اللي بتعبر عن أربع فصول لكل كتاب. يعني باستعمال الجمع المتكرر، أقدر أقول إنه عدد الفصول اللي قراها خالد هيساوي: أربعة، زائد أربعة، زائد أربعة، زائد أربعة، زائد أربعة، زائد أربعة، زائد أربعة، زائد أربعة. يعني هيساوي اتنين وتلاتين. وبكده أقدر أقول إن جملة الضرب هي تمنية في أربعة هتساوي اتنين وتلاتين.

وبكده هنكون اتعلّمنا إزاي نجيب ناتج الضرب في العدد أربعة باستعمال الشبكة أو الرسم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.