فيديو: العامل المشترك الأكبر

أوجد العامل المشترك الأكبر لـ ٧، ١٥، ٢١.

٠٢:٣٣

‏نسخة الفيديو النصية

أوجد العامل المشترك الأكبر لسبعة، وخمستاشر، وواحد وعشرين.

وخلّينا نفتكر إننا عشان نوجد العامل المشترك الأكبر لعددين أو أكتر، فأول حاجة بنعملها إننا بنكتب عوامل كل عدد، وبعد كده بنشوف إيه هي العوامل المشتركة بينهم. فهنبدأ الأول نكتب عوامل العدد سبعة، وعوامل العدد سبعة هي الأعداد اللي حاصل ضربها بيساوي سبعة، أو بمعنى آخر هي الأعداد اللي بتقبل القسمة على سبعة. فلو جينا نشوف إيه هم العددين اللي لو ضربناهم في بعض هيساوي سبعة، أول حاجة عندنا هيبقى واحد في سبعة، علشان واحد في سبعة بتساوي سبعة. طيب إيه تاني عوامل عندنا حاصل ضربها بيساوي سبعة؟ ما فيش؛ فبالتالي هيبقى عوامل العدد سبعة: واحد، وسبعة.

بعد كده هنكتب عوامل العدد خمستاشر، وعوامل العدد خمستاشر هي الأعداد اللي حاصل ضربها بيساوي خمستاشر؛ فهيبقى أول حاجة عندنا واحد في خمستاشر، فواحد في خمستاشر بتساوي خمستاشر؛ وبرضو عندنا تلاتة في خمسة، واللي حاصل ضربهم بيساوي خمستاشر؛ فبالتالي هتبقى عوامل العدد خمستاشر هي كل الأعداد دي؛ فمعنى كده إن العوامل هي: واحد، وتلاتة، وخمسة، وخمستاشر.

فبنفس الطريقة هنشوف إيه هي الأعداد اللي حاصل ضربها بيساوي واحد وعشرين؛ فأول حاجة عندنا هيبقى واحد في واحد وعشرين بتساوي واحد وعشرين؛ بعد كده هيبقى عندنا تلاتة في سبعة، واللي حاصل ضربهم بيساوي واحد وعشرين؛ فكده يبقى كتبنا كل عوامل العدد واحد وعشرين؛ فبالتالي هتبقى عوامل العدد واحد وعشرين هي: واحد، وتلاتة، وسبعة، وواحد وعشرين.

بعد كده عشان نوجد العامل المشترك الأكبر للتّلات أعداد، يبقى هنشوف إيه هي العوامل المشتركة بين عوامل العدد سبعة، وخمستاشر، وواحد وعشرين؛ وبعد كده هنشوف إيه هو أكبر عامل فيهم، اللي هيبقى العامل المشترك الأكبر. فهنلاحظ إن العامل المشترك الوحيد بين عوامل التلات أعداد، هو العدد واحد؛ فبالتالي هيبقى العامل المشترك الأكبر للأعداد: سبعة، وخمستاشر، وواحد وعشرين؛ هو واحد.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.