فيديو: إيجاد قياس زاوية في مثلث بمعلومية قياس الزوايا المتناظرة في مثلث مطابق له

في الشكل التالي، أوجد ق∠ﺟﻙﻝ.

٠٣:٤٧

‏نسخة الفيديو النصية

في الشكل التالي، اوجد قياس الزاوية ج ك ل.

بنلاقي إن الزاوية المطلوب إيجاد قياسها، هي الزاوية ج ك ل، اللي إحنا شايفنها دي. وبنلاقي في الشكل اللي إحنا شايفينه ده، إن الضلع ج ل بيساوي الضلع ل م. وبنلاقي كمان إن زاوية ج اللي إحنا شايفينها دي، هي زاوية قايمة. وزاوية م أيضًا هي زاوية قايمة. وقياس الزاوية م ك ل يساوي أربعة وتلاتين درجة. من الواضح إن عندنا مثلثين، زيّ ما إحنا شايفين. والمثلثين دول فيهم ضلعين متساويين. وفيهم ضلع مشترك، زي ما إحنا شايفين كده، هو الضلع ك ل. وكمان فيه زاويتين متساويتين، قياسهم تسعين درجة. بالمعلومات المتوفرة دي، ممكن نثبت التطابق بين المثلثين دول. وبكده ممكن نقدر نوجد قياس الزاوية المطلوبة إيجاد قياسها، هي الزاوية ج ك ل.

فبنلاقي إن في المثلثين ج ل ك، وَ م ل ك. ونركز في تسمية المثلثين؛ لأن ده مهم. فبنلاقي إن تمّ تسمية المثلثين بدءًا من الزاويتين المتساويتين. يبقى الزاوية ج، والزاوية م متساويتين. فبدأنا بـ ج وَ م، زي ما إحنا شايفين كده. بعد كده اتحرّكنا الضلع المتساوي، وهو الضلع ج ل. يبقى من ج لِـ ل. وبعد كده من م لِـ ل. وآخر حاجة اتحرّكنا ناحية الضلع المشترك، اللي هو عبارة عن ل ك. يبقى المثلثين هيكونوا عبارة عن المثلث ج ل ك، والمثلث م ل ك.

بنكمّل بعد كده، وبنثبت التطابق. فبنلاقي إن أول حاجة في المثلثين دول، الضلع ج ل يساوي الضلع م ل؛ وده معطى. تاني حاجة، بنلاقي عندنا إن الضلع ل ك، هو ضلع مشترك. يبقى بنكتب كده: ل ك ضلع مشترك. تالت حاجة، بنلاقي إن قياس الزاوية ج يساوي قياس الزاوية م. وبكده نقدر نقول إن المثلث ج ل ك، بيطابق المثلث م ل ك.

ونتيجة للتطابق ده، بتكون الزوايا المتبقية متساوية. يعني نقدر نقول إن قياس الزاوية ج ك ل، هتساوي قياس الزاوية م ك ل. بنلاحظ إن إحنا قدرنا نوجد التسمية كالتالي. في المثلث الأول كان مطلوب إيجاد قياس الزاوية ج ك ل. فبالتالي بدأنا بـ ج، بعد كده ك، بعد كده ل. يبقى في المثلث التاني هنبدأ بـ م، بعد كده ك، بعد كده ل.

من الشكل الموضح، بنلاقي إن قياس الزاوية م ك ل بيساوي أربعة وتلاتين درجة. فبنكتب كده: قياس الزاوية هيساوي أربعة وتلاتين درجة. يبقى قياس الزاوية ج ك ل يساوي أربعة وتلاتين درجة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.