فيديو: إنشاء مجموعة بيانات بمعلومية مداها والوسيط والمنوال

مدى مجموعة من أربعة أعداد هو ٧، والوسيط هو ١٣، والمنوال هو ١٦. إذا كان أكبر عدد يُمثِّل المنوال أيضًا، فما الأعداد الأربعة؟

٠٣:٣٣

‏نسخة الفيديو النصية

مدى مجموعة من أربعة أعداد هو سبعة. والوسيط هو تلتاشر. والمنوال هو ستاشر. إذا كان أكبر عدد يمثّل المنوال أيضًا، فما الأعداد الأربعة؟

يعني معطى عندنا إن فيه مجموعة بيانات بتتكوّن من أربعة أعداد. وبعد كده معطى عندنا في السؤال بعض المعطيات. زيّ إن المدى للمجموعة هو سبعة، والوسيط تلتاشر، والمنوال ستاشر. ومعطى أيضًا إن أكبر عدد في المجموعة بيمثّل المنوال أيضًا. فلو فرضنا إن البيانات اللي هنكتبها هنا مرتّبة من الأصغر إلى الأكبر. فبالتالي هيبقى العدد اللي هنكتبه هنا، اللي هو بيمثّل المنوال … معطى عندنا إن المنوال ستاشر، فبالتالي هيبقى ستاشر هو أكبر قيم المجموعة.

بعد كده هنستخدم المدى اللي معطى عندنا، اللي هو سبعة. وبما إن المدى هو الفرق بين أكبر قيمة وأصغر قيمة في المجموعة، اللي هم القيمتين دول. فبما إن المدى هو سبعة، فبالتالي هيبقى الفرق بين العدد ده والعدد ده، هو سبعة. فمعنى كده إننا لمّا نحسب ستاشر ناقص سبعة، هيبقى الناتج هو تسعة. وهنكتبه في أول قيم المجموعة. فبالتالي هيبقى ستاشر ناقص تسعة بيساوي سبعة. يعني الفرق بين أكبر قيمة وأصغر قيمة في المجموعة، واللي هو المدى، بيساوي سبعة. فيبقى إحنا كده أوجدنا أقل قيمة في المجموعة، وأكبر قيمة في المجموعة.

بعد كده علشان نوجد القيمتين اللي عندنا في الوسط، فهنلاحظ إن معطى عندنا إن المنوال هو ستاشر. وبما أن المنوال هو القيم الأكثر تكرارًا في البيانات، فمعنى كده إن هيبقى العدد ستاشر بيتكرّر في البيانات. فيبقى هنكتبه هنا. لأن معطى عندنا أيضًا إن أكبر عدد بيمثّل المنوال. فبالتالي هيبقى ستاشر هنا اللي هي أكبر عدد، وقبلها ستاشر. فبالتالي هيبقى المنوال ستاشر.

وناخد بالنا إن ممكن العدد ده كان يكون برضو ستاشر. لكن اللي معطى عندنا في السؤال، إن الوسيط هو تلتاشر. وخلّينا نفتكر إن الوسيط لمجموعة البيانات اللي عددها زوجي، هو المتوسط الحسابي للعددين الأوسطين. فبالتالي هيبقى الوسيط هو الوسط الحسابي، أو المتوسط الحسابي، للعددين دول.

وخلّينا نرمز للعدد اللي هنا بالرمز س. فبالتالي هيبقى الوسط الحسابي للعددين الأوسطين هو: س زائد ستاشر، على اتنين. يعني مجموعهم على عددهم. فهيبقى الوسط الحسابي للعددين الأوسطين ده، هو الوسيط لمجموعة البيانات. ووبما إن معطى عندنا إن الوسيط هو تلتاشر، فبالتالي هيبقى المقدار ده بيساوي تلتاشر. فهتبقى عندنا معادلة بالشكل ده. فعشان نوجد قيمة العدد ده، يبقى عايزين نحل المعادلة عشان نوجد قيمة س.

فأول خطوة هنعملها، إننا هنضرب الطرفين في اتنين. فهتبقى المعادلة عندنا هي: س زائد ستاشر يساوي ستة وعشرين. بعد كده عشان نوجد قيمة س، يبقى هنطرح ستاشر من طرفَي المعادلة. وبِطَرح ستاشر من الطرفين، هتبقى المعادلة هي: س يساوي عشرة. وبالتالي هيبقى عشرة هو قيمة العدد اللي هنكتبه هنا في مجموعة البيانات. وبكده يبقى إحنا قدرنا نوجد جميع الأعداد اللي في مجموعة البيانات اللي عندنا. فبالتالي هتبقى إجابة السؤال: «ما الأعداد الأربعة؟» هي: تسعة، وعشرة، وستاشر، وستاشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.