فيديو: إيجاد محيط مثلث

في الشكل ∆ﺩﻫو ∼ ∆ﺟﺏو، محيط ∆ﺟﺏو يساوي ١٠٤. إذا كان ﺩو = ٢١، وﺟ = ٢٨، فأوجد محيط ∆ﺩﻫو.

٠٢:٣٠

‏نسخة الفيديو النصية

في الشكل المثلث د ﻫ و يشابه المثلث ﺟ ب و. ومحيط المثلث ﺟ ب و يساوي مية وأربعة. إذا كان د و يساوي واحد وعشرين، وَ و ﺟ يساوي تمنية وعشرين. فأوجد محيط المثلث د ﻫ و.

ومُعطى عندنا الشكل اللي قدامنا. وعندنا إن المثلث د ﻫ و بيشابه المثلث ب ﺟ و. وخلينا في الأول نفتكر إننا لو عندنا مثلثين متشابهين، فبيبقى أضلاعهم المتناظرة متناسبة، وفي نفس الوقت زواياهم المتناظرة متطابقة. فهنلاحظ إن مُعطى عندنا إن د و بيساوي واحد وعشرين. ومُعطى إن و ﺟ بيساوي تمنية وعشرين. وزي ما عرفنا بما إن المثلثين متشابهين؛ فبالتالي هيبقى أضلاعهم المتناظرة متشابهة. وبما إننا عندنا د و وَ و ﺟ ضلعين متناظرين. فبعد كده عشان نحسب النسبة بين طولي الضلعين المتناظرين، هنلاحظ إن مُعطى عندنا د و بواحد وعشرين، وَ و ﺟ بتمنية وعشرين. ونقدر نختصر الكسر عن طريق إننا نقسم البسط والمقام على سبعة. فهتبقى النسبة هي تلاتة على أربعة.

والمطلوب عندنا في السؤال إننا نوجد محيط المثلث د ﻫ و. وخلينا في الأول نفتكر إن النسبة بين محيطي شكلين متشابهين بيساوي معامل تشابههما. ومعامل التشابه هو النسبة بين طولي ضلعين متناظرين. فمعنى كده إن النسبة بين محيطي شكلين بيساوي النسبة بين طولي ضلعين متناظرين. فبالتالي هيبقى محيط المثلث د ﻫ و، على محيط المثلث ﺟ ب و، بيساوي د و على و ﺟ. ومُعطى عندنا في السؤال محيط المثلث ﺟ ب و، واللي بيساوي مية وأربعة. فهنعوّض عن محيط المثلث ﺟ ب و بمية وأربعة. وبالتالي هيبقى محيط المثلث د ﻫ و على مية وأربعة، بيساوي النسبة بين د و وَ و ﺟ، واللي أوجدناها هنا بتلاتة على أربعة. فبكده بقى عندنا المجهول هو محيط المثلث د ﻫ و، واللي عايزين نوجده. فهنعمل ضرب تبادلي. فبالتالي هيبقى محيط المثلث د ﻫ و بيساوي مية وأربعة، في تلاتة، الكل مقسوم على أربعة. فلمّا نحسبها هتبقى بتساوي تمنية وسبعين. فبالتالي هتبقى الإجابة هي تمنية وسبعين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.