فيديو: تبسيط المقادير الجبرية

اختصر: (٢س^٣ − ٤س^٢ − ٩) − (٥س^٣ − ٣س + ١).

٠٢:٥٥

‏نسخة الفيديو النصية

اختصر: اتنين س أُس تلاتة، ناقص أربعة س أُس اتنين، ناقص تسعة؛ ناقص، خمسة س أُس تلاتة، ناقص تلاتة س، زائد واحد.

يعني معطى عندنا المقدار ده، وعايزين نختصره. فأول حاجة هنعملها، إننا هنفكّ الأقواس. فهنلاحظ إننا عندنا المقدار ده بين قوسين، ناقص المقدار ده. فلمّا نيجي هنا عند المقدار اللي بين قوسين، هنبدأ نفكّه، فهيبقى بيساوي اتنين س أُس تلاتة، ناقص أربعة س أُس اتنين، ناقص تسعة. يعني هيفضل زي ما هو. فكده يبقى إحنا فكّينا المقدار اللي بين قوسين ده، وكتبناه هنا.

بعد كده هنفكّ المقدار اللي بين قوسين ده. فهنلاحظ إن المقدار كله، اللي بين قوسين، مضروب في إشارة سالبة. فمعنى كده علشان نفكّ القوسين، يبقى لازم نضرب الإشارة السالبة في كل حد من حدود المقدار. فأول حاجة هنعملها إننا هنضرب الإشارة السالبة في خمسة س أُس تلاتة. فهيبقى بيساوي سالب خمسة س أُس تلاتة.

بعد كده هنضرب الإشارة السالبة في سالب تلاتة س. وبما إن سالب في سالب بموجب، فبالتالي هيبقى بيساوي موجب تلاتة س. بعد كده هنضرب الإشارة السالبة في موجب واحد، واللي هيساوي سالب واحد. فكده يبقى إحنا فكّينا الأقواس، وكتبنا المقدار. واللي هيبقى عبارة عن: اتنين س أُس تلاتة، ناقص أربعة س أُس اتنين، ناقص تسعة، ناقص خمسة س أُس تلاتة، زائد تلاتة س، ناقص واحد.

والخطوة اللي هنعملها بعد كده، إننا نجمع الحدود المتشابهة. فهنلاحظ إن عندنا هنا اتنين س أُس تلاتة، وسالب خمسة س أُس تلاتة. فهنلاحظ إن الحدّين دول متشابهين؛ لأن هم الاتنين ليهم نفس الأساس، ونفس الأُس؛ اللي هو س أُس تلاتة. فلمّا نحسب اتنين س أُس تلاتة، ناقص خمسة س أُس تلاتة، هتبقى بتساوي سالب تلاتة س أُس تلاتة.

بعد كده لو جينا نشوف الحد أربعة س أُس اتنين، فهنلاحظ إن ما فيش أيّ حدود تانية مشابهة ليه في حدود المقدار. فبالتالي هينزل زي ما هو. وهيبقى المقدار بيساوي سالب تلاتة س أُس تلاتة، ناقص أربعة س أُس اتنين، زائد تلاتة س. لأن بنفس الطريقة، هنلاحظ إن تلاتة س ما فيش حدود مشابهه ليها في حدود المقدار. فهينزل زيّ ما هو.

وآخر حاجة عندنا، هنلاحظ إن عندنا العدد الصحيح سالب تسعة، والعدد الصحيح سالب واحد. فهنلاحظ إن الحدين دول متشابهين، فبالتالي هنحسب سالب تسعة ناقص واحد. فلمّا نحسبها هتبقى بتساوي سالب عشرة. وبكده يبقى إحنا اختصرنا المقدار اللي عندنا. وهيبقى المقدار هو: سالب تلاتة س أُس تلاتة، ناقص أربعة س أُس اتنين، زائد تلاتة س، ناقص عشرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.