تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مخطط الساق والورقة

أحمد لطفي

يوضح الفيديو تعريف مخطط الساق والورقة، وكيفية استخدامها في تمثيل البيانات المختلفة.

٠٤:٥٠

‏نسخة الفيديو النصية

هنتكلّم عن مخطّط الساق والورقة. وهنعرف إيه هو مخطّط الساق والورقة. وإزاي هقدر أستخدمه في تمثيل البيانات المختلفة.

في مخطط الساق والورقة البيانات بتكون مترتّبة من الأصغر للأكبر. بحيث إن أرقام أصغر قيمة مكانية عادة بتكوّن الأوراق. وأرقام القيم المكانية التالية بتكوّن السيقان. ودول أهم مصطلحين في مخطط الساق والورقة؛ الأوراق والسيقان.

في صفحة جديدة هناخد مثال؛ عشان نقدر نوضح أكتر معنى مخطط الساق والورقة.

لو عندي جدول بالشكل ده بيوضح درجات طلبة في امتحان من خمسة وعشرين درجة. وعايز أمثّلهم في صورة مخطط الساق والورقة.

هنرسم خط بالشكل ده. وهنكتب على طرفه الأيسر الساق. وعلى طرفه الأيمن الورقة. هنشوف البيانات اللي بداخل الجدول، وهنشوف الأرقام اللي في خانة العشرات في كل البيانات. هنلاقي ممكن الرقم يكون واحد، أو ممكن صفر، أو ممكن اتنين. يبقى في العمود اللي مكتوب ساق هنكتب صفر وواحد واتنين بالشكل ده. هنشوف جميع الأعداد اللي خانة العشرات فيها الرقم صفر. هنلاقي عندي سبعة، فيبقى هكتب في الورقة سبعة. وهنلاقي ستة، هكتب في الورقة ستة. وعندي خمسة، هكتب في الورقة خمسة بالشكل ده. هنشوف جميع الأعداد اللي خانة العشرات فيها بتساوي واحد. فهلاقي عندي عشرة، وتسعتاشر، وتمنتاشر، وتلتاشر، وحداشر، واتناشر، واتناشر مرة أخرى، وعشرة، وحداشر. فهكتبهم في الورقة جنب بعض بالشكل ده. وأخيرًا هنشوف الأعداد اللي خانة العشرات فيها الرقم اتنين. هلاقي عندي خمسة وعشرين، وواحد وعشرين، وواحد وعشرين، وواحد وعشرين. فهكتبهم في خانة الورقة بالشكل ده.

محتاج أرتّب الشكل اللي قدامي. فيبقى هكتبه مرة كمان بس مع الترتيب. يبقى هرسم الخط وأكتب على الطرف الأيسر الساق. وعلى الطرف الأيمن هكتب الورقة. تحت كلمة الساق عندي صفر وواحد واتنين. اللي هي الأرقام اللي في خانة العشرات. وتحت الورقة هرتّب الأرقام اللي هي تُعتبر في خانة الآحاد من الأصغر للأكبر. هيبقى عندي خمسة ستة سبعة. بعدين صفر صفر واحد واحد اتنين اتنين تلاتة تمنية تسعة. وبعدين واحد واحد واحد خمسة. يبقى كده قدرت أرتّب مخطط الساق والورقة والبيانات مترتّبة من الأصغر للأكبر.

يبقى أنا القيم اللي موجودة في خانة الساق بتمثّل أرقام العشرات في البيانات. والقيم اللي موجودة في خانة الورقة بتمثّل أرقام الآحاد في البيانات.

عشان نقدر نحدّد مفتاح المخطّط بتاع الساق والورقة، هنكتب اتنين وشرطة واحد. دي بتمثّل اتناشر درجة. معناها إن الواحد بيمثّل رقم العشرات في اتناشر. واتنين بتمثّل رقم الآحاد في اتناشر. يبقى هو ده مفتاح مخطّط الساق والورقة.

هنعرّف مصطلح اسمه المدى. وهو عبارة عن الفرق بين أكبر عدد وأصغر عدد في مجموعة من الأعداد. فهلاقي إن أكبر عدد هو خمسة وعشرين، وأصغر عدد هو خمسة. يبقى المدى هيساوي خمسة وعشرين ناقص خمسة بيساوي عشرين. وأقدر أحدّد الوسيط. الوسيط هو عبارة عن العدد الأوسط في مجموعة من الأعداد. وهو بيساوي اتناشر. وأقدر أحدّد المنوال هيكون بيساوي واحد وعشرين، اللي هو أكتر عدد متكرر. فهلاقي عندي عشرة متكررة مرتين. وحداشر متكررة مرتين. اتناشر متكررة مرتين. لكن واحد وعشرين متكررة تلات مرات. ويبقى المنوال بيساوي واحد وعشرين.

يبقى أنا كده عرفت مخطّط الساق والورقة معناه إيه. وقدرت أستخدمه عشان أرتّب البيانات من الأصغر للأكبر. وقدرت أحدّد مفتاح مخطط الساق والورقة. وعرفت إزَّاي من خلاله أحدّد تلات مصطلحات: المدى، والوسيط، والمنوال.