تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ضرب الأعداد الكسرية: ضرب عدد كسري في عدد كسري

نهال عصمت

يوضِّح الفيديو بالأمثلة طريقة ضرب الأعداد الكسرية (ضرب عدد كسري في عدد كسري آخر).

٠٤:١٣

‏نسخة الفيديو النصية

ضرب الأعداد الكسرية.

هنتكلم عن ضرب الأعداد الكسرية. يعني عايزين نتعلم إزاي نضرب عدد كسري في عدد كسري آخر. بس في البداية عايزين نعرف يعني إيه أعداد كسرية، أو يعني إيه عدد كسري. معنى كلمة عدد كسري، يعني عدد مكوّن من عدد صحيح وكسر؛ زيّ واحد وأربعة على خمسة، وزيّ ستة وواحد على تلاتة مثلًا. الأعداد دي بنسمّيها أعداد كسرية؛ عشان أعداد مكوّنة من عدد صحيح وكسر.

عايزين نتعلم إزاي نضرب عدد كسري في عدد كسري آخر. عشان نعرف نضرب عدد كسري في عدد كسري آخر، لازم نحوّل العدد الكسري إلى كسر مركب. يعني إيه كسر مركب؟ يعني كسر متكوّن من بسط ومقام. وفي الحالة دي البسط هيبقى أكبر من المقام. هنحوّل إزاي العدد الكسري إلى كسر مركب؟

أول حاجة عايزين نحوّل واحد وأربعة على خمسة إلى كسر مركب. أول حاجة هننزّل المقام زيّ ما هو، هيبقى خمسة. عايزين نحسب قيمة البسط، بنعمل إيه؟ بنضرب العدد الصحيح في المقام، واحد في خمسة بخمسة. بعد كده نجمع الناتج على البسط، خمسة زائد أربعة، تسعة. يبقى هنكتب في البسط تسعة. علامة الضرب هننزّلها زي ما هي.

عايزين نحوّل ستة وواحد على تلاتة إلى كسر مركب، يبقى هننزل المقام زي ما هو تلاتة. عشان نحسب البسط، هنضرب العدد الصحيح في المقام، ستة في تلاتة بتمنتاشر. بعد كده نجمع الناتج على البسط، تمنتاشر زائد واحد، تسعتاشر. يبقى في الحالة دي عايزين نضرب تسعة على خمسة، في تسعتاشر على تلاتة، وعايزين نحسب الناتج.

هنلاحظ إن قبل عملية الضرب، ممكن نختصر. ممكن نختصر تسعة على التلاتة، فيها التلاتة. وتلاتة على التلاتة، فيها الواحد. بعد كده نبدأ نضرب. هيبقى عندنا في البسط تلاتة وتسعتاشر. وعندنا في المقام خمسة وواحد. في حالة ضرب كسر في كسر آخر، هنضرب البسط في البسط، ونكتبه في البسط. هيبقى عندنا في البسط تلاتة في تسعتاشر. وهنضرب المقام في المقام، وهنكتبه في المقام. هيبقى في المقام خمسة في واحد. هنبدأ نضرب، هيساوي … في البسط تلاتة في تسعتاشر بسبعة وخمسين، وفي المقام خمسة في واحد بخمسة.

هنلاحظ إن حاصل الضرب عبارة عن كسر مركب، يعني البسط أكبر من المقام. عايزين نحوّل الكسر المركب إلى عدد كسري. هنبدأ نقسم قسمة مطوّلة. هنقسم سبعة وخمسين على خمسة. هناخد أول عدد ناحية الشمال، ونبدأ نقسم. خمسة على خمسة فيها الواحد، هنكتب واحد فوق. بعد كده نضرب واحد في خمسة بخمسة، هنكتبها تحت الخمسة. ونبدأ نطرح. خمسة ناقص خمسة بصفر. هننزّل العدد اللي بعد كده، وهو السبعة. سبعة على الخمسة فيها الكام؟ أقرب عدد نضربه في خمسة ويدّينا سبعة، أو عدد أقل من السبعة، هو الواحد. يبقى واحد في خمسة بخمسة، نكتبها تحت السبعة، ونبدأ نطرح. سبعة ناقص خمسة باتنين. هيبقى الكسر هو أو العدد هو: حداشر عدد صحيح، واتنين على خمسة.

يبقى كده قدرنا نحوّل الكسر المركب إلى عدد كسري؛ يعني عدد مكوّن من عدد صحيح وكسر. وبكده اتكلمنا عن ضرب الأعداد الكسرية، وفهمنا يعني إيه عدد كسري.