تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: كتابة المتباينات ورسمها على خط الأعداد

نهال عصمت

يوضح الفيديو طرق كتابة ورسم المتباينات على خط الأعداد، والكلمات التي تعبِّر عن كلِّ علامة من علامات المتباينات، وأمثلة توضح كتابة العبارات على صورة متباينات.

٠٥:٠٦

‏نسخة الفيديو النصية

كتابة المتباينات ورسّمها على خط الأعداد.

هنتكلّم عن المتباينات، وإزاي نعرف نكتبها، وطرق رسم المتباينات على خط الأعداد. في البداية هنبدأ نعرف يعني إيه متباينات. معنى كلمة متباينة، يعني عندنا طرفين. ولْيكُن ده الطرف الأول، وده الطرف الثاني. هتبقى بينهم يا إمّا علامة أكبر من، أو علامة أصغر من. أو علامة أكبر من أو يساوي، أو علامة أصغر من أو يساوي. وممكن كمان يبقوا عبارة عن تلات أطراف. أمّا لو بينهم علامة يساوي، ففي الحالة دي هنسميها معادلة، مش متباينة.

لو عملنا أيّ عملية حسابية على أحد الأطراف. ولْيكُن عملية جمع أو طرح أو ضرب أو قسمة. لازم نعمل نفس العملية الحسابية، على الطرف الآخر. أطراف المتباينة ممكن تبقى عبارة عن متغيّر. المتغير ممكن يبقى س، أو ص. ممكن كمان تبقى عبارة عن مقدار جبري؛ زيّ س زائد واحد، أو س زائد ص. أو ممكن تبقى عدد ثابت؛ زيّ تلاتة، أو أربعة، أو خمسة، وهكذا …

بعد ما عرفنا يعني إيه متباينة، هنبدأ نعرف إزاي نكتب المتباينة. عن طريق بعض الكلمات التي تعبّر عن كل علامة من علامات المتباينة. هنجيب صفحة جديدة، ونرسم فيها جدول. وهنكتب فيها العلامات: أصغر من، وأكبر من، وأصغر من أو يساوي، وأكبر من أو يساوي.

أول علامة بنكتبها بالكلمات: أقل من، أو أصغر من. تاني علامة: هي أكثر من، أو أكبر من. تالت علامة: على الأكثر، ليس أكثر من، أقل من أو يساوي. وآخر علامة: على الأقل، ليس أقل من، أكبر من أو يساوي. هنبدأ نشوف مثال.

عددٌ ما طُرح منه خمسة، يساوي اتناشر على الأقل. عندنا في السؤال كلمة «على الأقل». هنبصّ في الجدول، هنلاقي على الأقل هي علامة أكبر من أو يساوي. «عددٌ ما»، هنفرض العدد س. «طُرح منه خمسة»، يبقى ناقص خمسة. هيبقى «على الأقل»، يبقى أكبر من أو يساوي اتناشر.

نشوف مثال تاني. المقدار الذي يزيد عن عددٍ ما بمقدار تلاتة، أقل من ضعف العدد. عندنا في السؤال كلمة «أقل من». عايزين نكتب المقدار. المقدار هو: عددٌ ما يزيد بمقدار تلاتة. يبقى المقدار هو: س زائد تلاتة. كلمة «أقل من» في الجدول هي علامة أصغر من. يبقى هنعمل علامة أصغر من. ضعف العدد هو اتنين س.

وبكده بعد ما عرفنا يعني إيه متباينة، وإزاي نكتب الجمل على صورة متباينات. هنجيب صفحة جديدة، ونبدأ نرسم فيها جدول. ونبدأ نرسم المتباينات على خط الأعداد.

عندنا س أصغر من تلاتة. هنرسم خط الأعداد. عندنا س أصغر من تلاتة، يبقى هنيجي عند تلاتة، وهنعمل دايرة مفتوحة. عشان س مش بتساوي تلاتة، لكن س هي كل الأعداد اللي أصغر من تلاتة. يبقى هناخد كل الأعداد الأصغر من تلاتة. والأعداد بتقلّ ناحية اليسار.

عايزين بعد كده نرسم المتباينة: س أكبر من تلاتة. هنرسم خط الأعداد. عندنا س أكبر من تلاتة، يبقى هنيجي عند تلاتة، وهنعمل دايرة مفتوحة. هنعملها مفتوحة، عشان س مش بتساوي تلاتة. أمّا س أكبر من تلاتة، يبقى هناخد كل الأعداد الأكبر من تلاتة. والأعداد بتزيد على خط الأعداد ناحية اليمين.

بعد كده عايزين نرسم المتباينة: س أصغر من أو يساوي تلاتة. هنرسم برضو خط الأعداد. عندنا س أصغر من أو يساوي تلاتة. يبقى هنيجي عند تلاتة، وهنعمل دايرة مغلقة؛ عشان س بتساوي تلاتة. س أصغر من أو تساوي تلاتة، يبقى هناخد كل الأعداد الأصغر من تلاتة. هناخد كل الأعداد الأصغر من تلاتة ناحية اليسار؛ عشان الأعداد بتقلّ ناحية اليسار على خط الأعداد.

عايزين بعد كده نرسم س أكبر من أو تساوي تلاتة. هنرسم برضو خط الأعداد. عندنا س أكبر من أو تساوي تلاتة، يبقى هنيجي عند تلاتة، وهنعمل دايرة مغلقة؛ عشان س بتساوي تلاتة. س أكبر من أو تساوي تلاتة، يبقى هناحد كل الأعداد اللي أكبر من تلاتة. وهناخد كل الأعداد في ناحية اليمين، يعني يمين التلاتة؛ عشان الأعداد بتزيد على خط الأعداد ناحية اليمين.

وبكده اتكلّمنا عن كتابة المتباينات، ورسّمها على خط الأعداد.