فيديو: إيجاد قياس زاوية في شكل رباعي بمعلومية العلاقة بين زواياه

أوجد ق∠ﺃ.

٠٢:٣٩

‏نسخة الفيديو النصية

أوجد قياس الزاوية أ. ومعطى عندنا الشكل الرباعي اللي في الصورة، وعايزين نوجد قياس زاوية أ.

وفي الأول خلينا نفتكر إن مجموع قياس زوايا الشكل الرباعي بيساوي تلتمية وستين درجة، فمعني كده إن قياس الزاوية أ زائد قياس الزاوية ب زائد قياس الزاوية ج زائد قياس الزاوية د بيساوي تلتمية وستين درجة.

وهنلاخظ من الشكل إن الزاوية ب والزاوية ج زوايا قايمة، فمعنى كده إن قياس زاوية ب بيساوي قياس زاوية ج بيساوي تسعين درجة. وقياس الزاوية أ بنرمز لها بخمسة س، وقياس الزاوية د بنرمز لها بـ س.

وبما إن مجموع قياس زوايا الشكل الرباعي بيساوي تلتمية وستين درجة، فبالتالي هيبقى خمسة س زائد تسعين زائد تسعين زائد س بيساوي تلتمية وستين. وعشان نوجد قياس الزاوية أ، يبقى في الأول محتاجين نوجد قيمة س. وفي الأول هنجمع الحدود المتشابهة، يعني هنجمع خمسة س زائد س، وهنجمع تسعين زائد تسعين. فخمسة س زائد س بتساوي ستة س، لما نجمع تسعين زائد تسعين هتساوي مية وتمانين، فهتبقى المعادلة ستة س زائد مية وتمانين بتساوي تلتمية وستين.

بعد كده هنطرح مية وتمانين من طرفَي المعادلة، فهيبقى الطرف الأيمن للمعادلة ستة س زائد مية وتمانين ناقص مية وتمانين فهيساوي ستة س. وأما الطرف الأيسر للمعادلة فهيبقى تلتمية وستين ناقص مية وتمانين، فلما نحسبها هتبقى بتساوي مية وتمانين.

بعد كده عشان نوجد قيمة س يبقى هنقسم طرفَي المعادلة على ستة، فهيبقى الطرف الأيمن للمعادلة ستة س على ستة فهيساوي س. أما الطرف الأيسر للمعادلة فهيبقى مية وتمانين على ستة، فلما نحسبها هتساوي تلاتين.

بعد كده عشان نوجد قياس الزاوية أ يبقى هنوجد قيمة خمسة س، وخمسة س بتساوي خمسة في تلاتين. فلما نضرب خمسة في تلاتين هتساوي مية وخمسين؛ فبالتالي هيبقى قياس الزاوية أ بتساوي مية وخمسين درجة، وقدرنا نوجدها بمعلومية إن مجموع قياس زوايا الشكل الرباعي بتساوي تلتمية وستين درجة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.