فيديو: خواص متوازي الأضلاع

أي عبارة من العبارات التالية صحيحة عن متوازي الأضلاع؟ [أ] متوازي الأضلاع به أربع زوايا قائمة. [ب] متوازي الأضلاع به ضلعان فقط متوازيان. [ج] متوازي الأضلاع به أربعة أضلاع متطابقة. [د] متوازي الأضلاع به أربعة أضلاع متساوية في الطول. [ﻫ] متوازي الأضلاع به زوجان من الأضلاع المتوازية والمتقابلة.

٠٤:٥٤

‏نسخة الفيديو النصية

أي عبارة من العبارات التالية صحيحة عن متوازي الأضلاع؟ أ: متوازي الأضلاع به أربع زوايا قائمة. ب: متوازي الأضلاع به ضلعان فقط متوازيان. ج: متوازي الأضلاع به أربعة أضلاع متطابقة. د: متوازي الأضلاع به أربعة أضلاع متساوية في الطول. ﻫ: متوازي الأضلاع به زوجان من الأضلاع المتوازية والمتقابلة.

عاوزين نعرف أي عبارة من الخمس عبارات اللي قلناها دول، هي اللي صح عن متوازي الأضلاع. يعني عندنا أربعة غلط وواحدة صح. عايزين نعرف إيه هي الصح ونختارها.

ده هو شكل متوازي الأضلاع. إيه هي خواصه؟ متوازي الأضلاع شكل رباعي. يعني له أربع أضلاع. فيه كل ضلعين متقابلين متوازيين. يعني إيه؟ يعني الضلع ده بيوازي الضلع ده. أهو الضلع ده كده بيوازي الضلع ده. وزيه الضلع ده بيوازي الضلع ده.

وكمان فيه كل زاويتين متقابلتين متساويتان في القياس. يعني إيه؟ يعني الزاوية دي قد الزاوية دي بالظبط. والزاوية دي قد الزاوية دي اللي قُبالها بالظبط.

وكمان فيه كل ضلعين متقابلين متساويان في الطول. يعني إيه؟ يعني عندنا الضلع ده قَدّ الضلع ده اللي قصاده، بيوازيه وطوله. وزيه الضلع ده قَدّ الضلع ده، بيوازيه وله نفس الطول. لكن الضلع ده، ده كده ما بيوازيش ده اللي جنبه، ولا بيساويه.

وطبعًا القطرين، القطر ده والقطر ده، ينصّف كلًّا منهما الآخر.

ومجموع قياس أي زاويتين متتاليتين مية وتمانين. يعني قياس الزاوية دي مع دي مية وتمانين. ودي مع دي مية وتمانين. أي زاويتين جنب بعض قياسهم مية وتمانين درجة.

ده بالنسبة لخواص متوازي الأضلاع. هنبص بقى في الاختيارات، ونشوف الكلام اللي مكتوب ده صح وزي اللي إحنا قلناه ولا غلط.

أول اختيار: متوازي الأضلاع به أربع زوايا قائمة. هو الكلام ده صح؟ هل الزوايا دي كلها كده تسعين درجة؟ لأ طبعًا. يبقى معنى كده إن الاختيار الأول ده مش صح.

طب نيجي لِلّي بعده: متوازي الأضلاع به ضلعان فقط متوازيان. فيه ضلعين بس متوازيان؟ لأ طبعًا. ده هو فيه الضلعين دول اللي هو الضلع ده بيوازي ده، وكمان الضلعين دول اللي هو ده بيوازي ده. يبقى برضو الاختيار ده مش صح.

طيب نشوف اللي بعده: متوازي الأضلاع به أربعة أضلاع متطابقة. يعني الأربع أضلاع بتوعه كلهم قَدّ بعض؟ طبعًا لأ. إحنا قلنا إن ده قَدّ ده. بس ده مش قد ده. فمعنى كده إن كل ضلعين قصاد بعض همّ اللي قَدّ بعض. لكن اللي جنب بعض مالهمش نفس الطول، أو مش متطابقين. يبقى برضو الاختيار ده مش صح.

نشوف اللي بعده: متوازي الأضلاع به أربعة أضلاع متساوية في الطول. إحنا لسه بنقول إيه؟ ما هو ما دام الأربع أضلاع مش متطابقة، يبقى مش متساوية في الطول. فالاختيارين غلط. فبرضو نستبعد الاختيار ده.

نيجي لآخر اختيار: متوازي الأضلاع به زوجان من الأضلاع المتوازية والمتقابلة. يعني إيه؟ يعني بيقول لنا متوازي الأضلاع اللي قدامنا ده، فيه الضلعين دول؛ ده واللي قصاده اللي بيقابله، المتقابلة. ما لهم؟ بيوازوا بعض. صح. زيه برضو الضلعين دول؛ ده وده، متقابلين وبيوازوا بعض. يبقى هي دي الإجابة الصح؛ لأنها فعلًا خاصية من خواص متوازي الأضلاع اللي قلناها، وهي إن كل ضلعين متقابلين متوازيين. يبقى هي دي الإجابة الصح: متوازي الأضلاع به زوجان من الأضلاع المتوازية والمتقابلة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.