فيديو: إيجاد مساحة شكل مجهول بِعَدِّ مربعات الوحدة التي تُكوِّن الشكل

صنع باسم هذه العلامة ليستخدمها في الإعلان عن بيع حديقته. أوجد مساحتها.

٠٣:٢٦

‏نسخة الفيديو النصية

صنع باسم هذه العلامة ليستخدمها في الإعلان عن بيع حديقته. اوجد مساحتها.

أول حاجة نفكَّر فيها لحل السؤال ده هو إزَّاي نقسم الشكل ده لأشكال نقدر نوجد مساحتها بسهولة. يعني مثلًا هنا هنلاقي إن على يمين الشكل موجود مثلث، ونعرف نوجد مساحته بسهولة. وعلى شمال الشكل موجود مثلثين متطابقين. ده المثلث الأول وهنا المثلث التاني. وهنلاقي هنا في نص الشكل اتكوِّن عندنا مستطيل. هنسمي المثلث الموجود على اليمين الشكل رقم واحد. والمثلثين اللي موجودين على الشمال هنسميهم اتنين وتلاتة. والمستطيل اللي في النص هنسميه الشكل رقم أربعة. وبكده هتكون مساحة الشكل هتساوي مساحة المثلث رقم واحد، زائد مساحة المثلث رقم اتنين، زائد مساحة المثلث رقم تلاتة، زائد مساحة المستطيل رقم أربعة.

مساحة المثلث بتساوي نُص طول القاعدة في الارتفاع. ومساحة المستطيل بتساوي الطول في العرض. طول قاعدة المثلث رقم واحد نقدر نحسبها بعَدِّ المربعات المكوِّنة لقاعدة المثلث رقم واحد. يعني هنا المربعات اللي موجود عليها قاعدة المثلث عددها واحد، اتنين، تلاتة، أربعة، خمسة، ستة. ست وحدات. وارتفاع المثلث هنا بيتكوِّن من تلات وحدات. وبكده هتكون مساحة المثلث رقم واحد نُص في طول القاعدة ست وحدات في الارتفاع تلات وحدات.

مساحة المثلث اتنين نقدر نحسبها بنفس الطريقة. نص طول القاعدة في الارتفاع. القاعدة هنا مكوَّنة من تلات وحدات. والارتفاع برضو مكوّن من تلات وحدات. يعني مساحة المثلث اتنين هتساوي نُص في تلاتة في تلاتة.

مساحة المثلث تلاتة هي هي مساحة المثلث اتنين. القاعدة هنا مكوَّنة من تلات وحدات، والارتفاع برضو مكوّن من تلات وحدات. يعني مساحة المثلث تلاتة هتساوي نص في تلاتة في تلاتة.

فاضل عندنا نحسب مساحة المستطيل أربعة. يعني هنضرب الطول في العرض. الطول عندنا هنا بواحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر، تلتاشر، أربعتاشر، خمستاشر، ستاشر، سبعتاشر. يبقى طول المستطيل هنا سبعتاشر وحدة، وعرضه هو هو قاعدة المثلث رقم واحد؛ ست وحدات. وبكده مساحة المستطيل هتساوي الطول في العرض؛ يعني هتساوي سبعتاشر في ستة. هنبدأ نحسب مساحة المثلث رقم واحد. نص في تلاتة بستة. التلاتة في تلاتة بتسعة. زائد مساحة المثلث رقم اتنين. نص في تلاتة في تلاتة. التلاتة في تلاتة بتسعة. وتسعة في نص بأربعة ونص. زائد مساحة المثلث رقم تلاتة هي هي مساحة المثلث رقم اتنين. وهتساوي أربعة ونص. زائد السبعتاشر في ستة هتساوي مية واتنين. وهنجمع تسعة، زائد أربعة ونص، زائد أربعة ونص، زائد مية واتنين. هيدي لنا مية وعشرين. وبكده قدرنا نعرف إن مساحة الشكل مية وعشرين وحدة مربعة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.