فيديو: المقادير والجمل العددية

يوضح الفيديو ما المقادير، وما الجمل العددية، وما الفرق بينهما، وكيفية كتابتهما، وأمثلةً عليها.

٠٤:٣١

‏نسخة الفيديو النصية

المقادير والجمل العددية.

في الفيديو ده، هنتعلّم إيه هي المقادير والجمل العددية، وعلى طريقة كتابتهم. المقادير هي دمج بين الأعداد والعمليات. زيّ مثلًا خمسة زائد سبعة. وتلاتة زائد اتنين زائد خمسة. واتناشر ناقص تمنية. أمَّا الجمل العددية، فهي مقادير بتستخدِم الأعداد، وعلامات التساوي، أو أكبر من، أو أصغر من. زيّ مثلًا خمسة زائد سبعة بيساوي اتناشر. تلاتة زائد اتنين زائد خمسة بيساوي عشرة. اتناشر ناقص تمنية بيساوي أربعة.

نتنقل لصفحة تانية، ونحلّ شويّة أمثلة. سلّة برتقال عند أحد محلات الفواكه، بها ستاشر برتقالة. فإذا اشترت سلمى أربع برتقالات، فما المقدار المعبِّر عمَّا سبق؟

المقدار المعبّر عنه هيبقى ستاشر ناقص أربعة. لأن ستاشر هو عدد البرتقال الكلّي، وأربعة عدد البرتقالات اللي نقصت منهم بعد ما سلمى اشترتهم.

نتنقل لصفحة تانية. في نفس المحلّ، كانت سلة التفاح بها خمس تفاحات حمراء. وتلات تفاحات صفراء. وأربع تفاحات خضراء. والمطلوب كتابة مقدار يعبّر عن التفاحات الحمراء والخضراء، وكتابة جملة عددية تعبّر عن التفاح كله.

طيب عاوزين نكتب مقدار يعبِّر عن التفاحات الحمراء والخضراء. فهنشوف عدد التفاحات الحمراء، هنلاقيه خمسة. وعدد التفاحات الخضراء، هنلاقيه أربعة. فهنحطّ التفاحات الحمراء مع بعضها بالشكل ده، والتفاحات الخضراء بالشكل ده. فالمقدار المعبّر عنهم هيبقى خمسة، اللي هو عدد التفاحات الحمراء زائد أربعة، اللي هو عدد التفاحات الخضراء.

نكمّل في صفحة تانية. أمَّا الجملة العددية المعبّرة عن التفاح كله، فهتبقى خمسة، اللي هو عدد التفاحات الحمراء زائد أربعة، اللي هو عدد التفاحات الخضراء زائد تلاتة، اللي هو عدد التفاحات الصفراء. هيساوي اتناشر، اللي هو مجموع التفاح كلّه.

نحلّ مثال تاني. هتظهر قدامنا جملة عددية. والمطلوب معرفة العلامة اللي المفروض تتكتب في الفراغ هي ناقص ولّا زائد. باستخدام قطع العدّ، هنجرّب العلامتين. في حالة العلاقة ناقص هتبقى الجملة أربعة ناقص تلاتة بيساوي سبعة. فعشان نتأكّد، هتظهر قدامنا أربع قطع عدّ، هنطرح منهم تلاتة. يعني هنشطب على تلات قطع، هيتبقَّى معانا قطعة واحدة. يبقى الإجابة دي غير صحيحة.

نجرَّب علامة زائد، فالجملة هتبقى أربعة زائد تلاتة بيساوي سبعة. فهنستخدم قطع العدّ، وهنحطّ أربع قطع عدّ. بعدين هنضيف عليهم تلات قطع تانية؛ لأننا بنستخدم علامة الزائد. وهنعدّهم هنلاقيهم سبعة. يبقى الجملة العددية دي صحيحة. ويبقى العلامة اللي بتحقّق الجملة هي زائد.

وبكده نبقى خلّصنا الفيديو ده، اللي اتعلّمنا فيه إيه هي المقادير، والجمل العددية، وطريقة كتابتهم.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.