فيديو: إيجاد الارتفاع الأصغر لمتوازي أضلاع بمعلومية أطوال أضلاعه وارتفاعه الأكبر

طولا ضلعين متجاورين في متوازي أضلاع ٢٠ سم و٢٥ سم. إذا كان ارتفاعه الأكبر ٢٣ سم، فأوجد ارتفاعه الأصغر لأقرب سنتيمتر.

٠٤:٠٩

‏نسخة الفيديو النصية

طولا ضلعين متجاورين في متوازي أضلاع عشرون سنتيمترًا وخمسة وعشرون سنتيمتر. إذا كان ارتفاعه الأكبر ثلاثة وعشرون سنتيمتر، فأوجد ارتفاعه الأصغر لأقرب سنتيمتر.

مساحة متوازي الأضلاع بتساوي طول القاعدة في الارتفاع المناظر لها. فلو مثلًا ده شكل لمتوازي أضلاع، فهنلاقي إننا ممكن نعتبر إن الضلع ده هو القاعدة أو نعتبر إن الضلع ده هو القاعدة، وهيكون مناظر ليهم ارتفاعين عموديين عليهم، اللي هي المسافة ما بين كل قاعدة والضلع المقابل ليها. فهنلاقي إن ده الارتفاع المناظر للقاعدة الأولى، وده الارتفاع المناظر للقاعدة التانية. وهنلاحظ إن الارتفاع الأكبر مناظر للقاعدة الأصغر، والارتفاع الأصغر مناظر للقاعدة الأكبر.

فبالتالي هنحسب في الأول مساحة متوازي الأضلاع بإننا نضرب طول القاعدة الأصغر في الارتفاع الأكبر، ومنها هنقدر نوجد الارتفاع الأصغر؛ تبقى مساحة متوازي الأضلاع بتساوي … القاعدة الأصغر اللي هي عشرين سنتيمتر، في … الارتفاع المناظر لها اللي هو الارتفاع الأكبر، اللي هو تلاتة وعشرين سنتيمتر. فنضرب عشرين في تلاتة وعشرين، فده هيساوي … أول حاجة نضرب الصفر في التلاتة فده هيساوي صفر، بعدين نضرب الصفر في الاتنين، فده برضو هيساوي صفر، زائد … نكرر نفس العملية ونضرب الاتنين في الرقمين، وبما إن الاتنين القيمة المكانية ليها هي العشرات، فهنضيف صفر في الأول، بعدين نضرب بنفس الطريقة؛ اتنين في تلاتة هتساوي ستة، واتنين في اتنين هتساوي أربعة. بعدين نجمع؛ صفر زائد صفر هيساوي صفر، صفر زائد ستة هيساوي ستة وننزل الأربعة. تبقى مساحة متوازي الأضلاع بتساوي ربعمية وستين سنتيمتر مربع.

ربعمية وستين سنتيمتر مربع هتساوي طول القاعدة الكبرى اللي هو خمسة وعشرين سنتيمتر، في الارتفاع الأصغر؛ يبقى ربعمية وستين بتساوي خمسة وعشرين في الارتفاع الأصغر؛ فنقسم الطرفين على خمسة وعشرين، فهيبقى الارتفاع الأصغر بيساوي ربعمية وستين على خمسة وعشرين. فنحسب الناتج باستخدام القسمة المطوّلة؛ فنقسم أول رقمين من المقسوم على المقسوم عليه، فهنلاقي إن أقرب ناتج هو واحد، فنضرب واحد في خمسة وعشرين، فيبقى الناتج بيساوي خمسة وعشرين. بعدين نطرح ستة ناقص خمسة هيساوي واحد، وأربعة ناقص اتنين هيساوي اتنين. بعدين ننزّل الصفر ونكمل، ونقسم ميتين وعشرة على المقسوم عليه؛ فنلاقي إن أقرب ناتج هو تمنية، فنضرب تمنية في خمسة وعشرين، فده هيساوي ميتين، بعدين نطرح ميتين وعشرة ناقص ميتين هيساوي عشرة.

وبما إن الأرقام خلصت فهنضيف العلامة العشرية، ونضيف صفر على يمين العلامة العشرية، وده مش هيغير من القيمة، ونضيف العلامة العشرية في الناتج، بعدين ننزل الصفر ونكمّل بنفس الطريقة، ونقسم مية على خمسة وعشرين؛ فمية على خمسة وعشرين هتساوي أربعة، ولمّا نضرب الأربعة في الخمسة وعشرين، فالناتج هيساوي مية. بعدين نطرح مية ناقص مية هيساوي صفر، يبقى الارتفاع الأصغر هيساوي تمنتاشر وأربعة من عشرة سنتيمتر. وعشان نقربه لأقرب سنتيمتر، هنشوف الرقم اللي على يمين العلامة العشرية، فإذا كان الرقم أربعة أو أقل، فمفيش أي تغير هيحصل في الآحاد. أما إذا كان خمسة أو أكتر فهنضيف واحد للآحاد. وبما إن الرقم هو أربعة فمفيش تغير هيحصل في الآحاد؛ يبقى ممكن نقول إن الارتفاع الأصغر هيساوي تقريبًا بالتقريب لأقرب سنتيمتر تمنتاشر سنتيمتر، ودي الإجابة المطلوبة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.