فيديو: المقارنة بين عددين مُكونين من عدة أرقام

أيٌّ من الأعداد الآتية أصغر من ‎٤٨١٨٢؟ [أ] ٧٧٩٣٤ [ب] ‎٨‎٦٨٣٥ [ج] ‎ ٩٥٢٥٥ [د] ١١٦٨‎٨‎

٠٢:١٨

‏نسخة الفيديو النصية

أيّ من الأعداد الآتية أصغر من تمنية وأربعين ألف مية اتنين وتمنين؟

عندنا أربع أعداد اللي هما دول، عاوزين نعرف مين فيهم العدد اللي أصغر من تمنية وأربعين ألف مية اتنين وتمنين. علشان نعرف مين العدد الصغير هنقارن، فهنكتب العدد بتاعنا، اللي هو تمنية وأربعين ألف مية اتنين وتمنين، ونقارن ما بينه وما بين الأعداد اللي عندنا في الاختيارات. فهنمسك أول عدد، ونقارن بينه وبين العدد بتاعنا؛ أول عدد هو سبعة وسبعين ألف تسعمية أربعة وتلاتين. لمّا نيجي نقارن، بنبدأ من أكبر خانة، وهي خانة عشرات الألوف، بنبصّ على العدد اللي موجود في الخانة دي؛ هنا فيه أربعة وفي العدد بتاعنا اللي في الاختيارات فيه سبعة، السبعة أكبر من الأربعة؛ معناها إن العدد ده هو الكبير؛ يبقى مش هو الإجابة الصحيحة؛ لأننا عاوزين نطلّع أصغر عدد. طَبْ نشوف الاختيار اللي بعده.

ستة وتمنين ألف تمنمية خمسة وتلاتين، أول عدد في خانة عشرات الألوف كام؟ تمنية، برضو أكبر من الأربعة؛ يبقى العدد ده أكبر من العدد المطلوب؛ يبقى مش هو الإجابة اللي صح. نشوف العدد اللي بعده.

خمسة وتسعين ألف ميتين خمسة وخمسين، أول عدد في خانة عشرات الألوف هو التسعة، والتسعة أكبر من الأربعة؛ يبقى برضو مش دي الإجابة الصحيحة؛ لأن العدد أكبر من العدد اللي عندنا في السؤال.

ونشوف آخر عدد وهو حداشر ألف ستمية تمنية وتمنين، أول عدد في الخانة عشرات الألوف هنا هو الواحد، والواحد أصغر من الأربعة، يبقى فعلا العدد ده أصغر من العدد إيه اللي عندنا في السؤال؛ يبقى الإجابة الصحيحة هي دي حداشر ألف ستمية تمنية وتمنين.

وهو ده العدد الأصغر من تمنية وأربعين ألف مية اتنين وتمنين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.