فيديو: النسبة

يوضح الفيديو مفهوم النسبة، والفرق بين النسبة والكسر، والصور المختلفة للنسبة، مع أمثلة توضيحية.

٠٤:٢٢

‏نسخة الفيديو النصية

النسبة.

في البداية نقدر نعرّف النسبة إن هي عبارة عن مقارنة رقمين، أو كميتين مختلفتين، عن طريق القسمة. مش مقصود بالمقارنة هنا، إني أعرف أيّ رقم أكبر أو أصغر من التاني، أو أنهي كمية أكبر أو أصغر من التانية. كل اللي مقصود بالمقارنة هنا، إني أعرف علاقة الرقم الأولاني بالرقم التاني، أو الكمية الأولانية بالكمية التانية.

لو أنا عايز أدّي مثال على شكل النسبة، أقدر أدّي على سبيل المثال واحد على اتنين. واحد على اتنين، أقدر أستخدمه كشكل للنسبة. ولو ناخد بالنا في نفس الوقت، واحد على اتنين أقدر أستخدمها كشكل للكسر. طيب إيه الفرق بين الاتنين؟ نقدر ندّي مثال؛ اللي هو استخدام واحد على اتنين كنسبة، أو واحد على اتنين ككسر.

بالنسبة لواحد على اتنين ككسر … على سبيل المثال، لو قُلت إن أنا عندي شخص أكل نص تفاحة. فبالتالي الواحد على اتنين، أو النص، هي عبارة عن عدد التفاحات اللي أكلها الشخص. اللي أقدر أعبّر بيها في صورة واحد على اتنين ككسر. أو على سبيل المثال تفاحة، اللي هي واحد، أو اتنين، أو تلاتة، أو أربعة.

أمّا في استخدام واحد على اتنين كنسبة … واحد على اتنين هنا مش بنستخدمها كأنها عدد معيّن. هو عبارة عن عدد موجود في البسط، وعدد تاني موجود في المقام. كل عدد فيهم بيعبّر عن حاجة معينة. يعني على سبيل المثال، لو أنا عندي شخصين، معاهم تفاحة واحدة. فبالتالي هنا أقدر أقول إن أنا عندي عدد الأشخاص هم اتنين، بيملكوا عدد تفاحات عددهم واحد.

فلو أنا عايز أجيب عدد التفاحات، مقسومة على عدد الأشخاص. أو بمعنى تاني، النسبة بين عدد التفاحات، وعدد الأشخاص. بتساوي عفوًا … عدد التفاحات واحد، وعدد الأشخاص هو الاتنين. يعني عدد التفاحات على عدد الأشخاص، بيساوي واحد على اتنين. الواحد هنا بيعبّر عن عدد التفاحات. والاتنين بتعبّر عن عدد الأشخاص. وهو ده الفرق بين النسبة والكسر. الكسر بيعبّر عن جزء من حاجة معينة. أمّا النسبة، هي عبارة عن علاقة بين حاجتين، أو كميتين مختلفتين.

لو أنا عايز أدّي مثال تاني للنسبة، أقدر أدّيه أو أقدر أكتبه في صفحة جديدة. على سبيل المثال، لو أنا عندي عدد تلات تفاحات، وعدد أربع برتقالات. وطالب منّي إني أجيب النسبة بين عدد البرتقالات، إلى عدد التفاحات. يعني أنا عايز أقسم عدد البرتقالات، على عدد التفاحات. عدد البرتقالات اللي عندي، بيساوي أربعة. وعدد التفاحات بيساوي تلاتة. فبالتالي عدد البرتقالات، على عدد التفاحات، بيساوي أربعة على تلاتة.

وأقدر أعبّر عن النسبة في صورة تانية، اللي هي عدد البرتقالات، إلى عدد التفاحات. النقطتين دول هم علامة النسبة. بيساوي أربعة إلى تلاتة. طيب لو أنا عايز أجيب عدد التفاحات، مقسوم على عدد البرتقالات. أو بمعنى تاني، عايز أجيب النسبة بين عدد التفاحات، إلى عدد البرتقالات. بيساوي تلاتة على أربعة. وأقدر أعبّر عنها برضو في صورة عدد … عفوًا، عدد التفاحات إلى عدد البرتقالات، بيساوي تلاتة إلى أربعة.

وده بيبيّن لي قدّ إيه الترتيب مهم في النسبة. يعني حدَّي النسبة، الترتيب فيهم لو غيّرته، هيغيّر شكل النسبة. فبالتالي أهمّ حاجة ناخد بالنا منها، وإحنا بنكتب نسبة أيّ حاجة، هي ترتيب الكميات. طيب لو على سبيل المثال، عندي خمس تفاحات وبرتقالة واحدة. يبقى النسبة بين عدد التفاحات إلى عدد البرتقالات، بيساوي خمسة على واحد. يعني بيساوي خمسة.

وده بيثبت، أو بيقول إن مش لازم النسبة تكون عبارة عن رقمين مكتوبين، أو عددين مكتوبين. ممكن يكون عدد واحد. أو عدد ممكن اختصاره مع عدد تاني. هنا عندي في المثال التاني، عدد التفاحات على عدد البرتقالات، يساوي تمنية على أربعة. يعني بيساوي اتنين. كل اللي أنا عملته، إني اختصرت البسط والمقام. عن طريق إن أنا قسمت كل واحد فيهم على أربعة.

في الحالة دي إحنا عرفنا إيه هي النسبة. وإيه الفرق بين النسبة وبين الكسر. وبَستخدم النسبة في إيه. وقدّ إيه ترتيب الكميات، أو ترتيب الحدود في النسبة مهم جدًّا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.