فيديو: تصنيف المثلثات وفق أضلاعها

يوضح الفيديو تصنيف المثلثات بحسب أطوال الأضلاع إلى: متساوي الأضلاع، مختلف الأضلاع، متساوي الضلعين.

٠٤:٢٦

‏نسخة الفيديو النصية

هنتعرَّف في الدرس ده على نوع من أنواع التصنيف للمثلثات. كلّ مثلث نقدر نصنّفه بحسب أطوال أضلاعه. هنعرف إيه الأنواع اللي ممكن نصنّف بيها المثلث بحسب أطوال أضلاعه. المثلث بيتكوّن من تلات أضلاع. كلّ ضلع بنعتبره قطعة مستقيمة. ولو فيه ضلعين أو أكتر، كانوا ليهم نفس الطول، فبنسمّي القطع المستقيمة دي، اللي ليها نفس الطول، قطع مستقيمة متطابقة.

وعلى الرسم، عشان نوضّح إن الأضلاع دي ليها نفس الطول، أو إن القطع المستقيمة دي متطابقة. فبنستخدم الشرط اللي إحنا بنستخدمها، وبنحطّها على الرسم زيّ دي. الشرط دي لمّا بتتكرّر بنفس الشكل معناها إن الأضلاع دي ليها نفس الطول، أو إن القطع المستقيمة دي متطابقة.

لو جينا نصنّف المثلثات بحسب أطوال أضلاعها، هنلاقي أول حالة عندنا هي مثلث متطابق الأضلاع. يعني إيه متطابق الأضلاع؟ يعني التلات أضلاع ليهم نفس الطول. يعني أضلاعه الثلاثة متطابقة. تاني نوع من الأنواع اللي ممكن نقابلها، مثلث متطابق الضلعين. يعني إيه متطابق الضلعين؟ واضح من الاسم بتاعه إنه فيه ضلعين ليهم نفس الطول. يعني فيه ضلعين على الأقل متطابقين. تالت حالة ممكن نقابلها هي المثلث مختلف الأضلاع. وزيّ ما باين من الاسم بتاعه، مختلف الأضلاع يعني أضلاعه التلاتة مختلفة، ما فيش أيّ ضلع ليه نفس طول الضلع الآخر. ده بنسمّيه مثلث مختلف الأضلاع.

بما أن المثلث المتطابق الضلعين شرطه إنه يبقى فيه ضلعين على الأقل متطابقين. فده معناها إن المثلث متطابق الأضلاع، اللي فيه تلات أضلاع متطابقة، بيحقّق الشرط ده. فنقدر نعتبره حالة خاصّة من المثلث متطابق الضلعين. ونقدر نقول على كل المثلثات متطابقة الأضلاع: إنها برضو مثلثات متطابقة الضلعين.

هنشوف دلوقتي بعض الأمثلة اللي هنصنّف فيها المثلثات بحسب أطوال أضلاعها. مطلوب مننا نصنف كلّ من المثلثات الآتية إلى: مختلف الأضلاع، متطابق الأضلاع، أو متطابق الضلعين.

هنشوف أول مثلث عندنا. هنلاقي إن المثلث ده فيه ضلعين متطابقين. وده باين من العلامة أو الشرط اللي موجودة على الضلعين دول. دي معناها، العلامة دي، تطابُق الضلعين. يبقى نقدر نقول: بما إن المثلث فيه ضلعين متطابقين فقط، فنقدر نسمّيه أو نصنّفه إن هو مثلث متطابق الضلعين.

لو بصّينا في الشكل رقم اتنين، هنشوف أطوال الأضلاع بتاعة المثلث اللي قدامنا. هنلاقي واحد طوله خمسة سنتي. الضلع التاني طوله اتناشر سنتي. والتالت طوله تلتاشر سنتي. أطوال أضلاعه التلاتة مختلفة. فنقدر نقول: إن المثلث ده، عشان ما فيش فيه أيّ أضلاع متطابقة، نقدر نسمّيه مثلث مختلف الأضلاع.

هنشوف دلوقتي أهم حاجة اتعلّمناها في الدرس ده. اتعلّمنا في الدرس ده إزّاي نقدر نصنّف المثلثات وفق أطوال أضلاعها. أول حاجة المثلث متطابق الأضلاع، اللي بيبقى فيه تلات أضلاع متطابقة. تاني نوع اللي هو مثلث متطابق الضلعين، واللي بيبقى فيه ضلعين على الأقلّ متطابقين. والنوع التالت اللي هو مثلث مختلف الأضلاع؛ ما فيهوش أيّ ضلع طوله بيساوي الضلع الآخر. لا توجد فيه أضلاع متطابقة.

وعرفنا كمان إن المثلث متطابق الأضلاع بنقدر نعتبره حالة خاصّة من المثلث متطابق الضلعين؛ عشان متطابق الضلعين فيه على الأقلّ ضلعين متطابقين. وده بيحقّقه المثلث متطابق الأضلاع، اللي فيه تلات أضلاع متطابقة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.