فيديو: امتحان الاستاتيكا للعام السابق • ٢٠١٨/٢٠١٧ • السؤال الخامس

امتحان الاستاتيكا للعام السابق • ٢٠١٨/٢٠١٧ • السؤال الخامس

٠٢:٥٨

‏نسخة الفيديو النصية

جسم وزنه ستة وتلاتين نيوتن، وضع على مستوًى أفقي خشن. إذا كان معامل الاحتكاك السكوني بين الجسم والمستوى تُلت، فأوجد في صورة فترة كل قيم قوة الاحتكاك الممكنة التي تمنع الجسم من الحركة.

عندنا جسم وزنه ستة وتلاتين نيوتن، موضوع على مستوى أفقي خشن. معامل الاحتكاك السكوني بين الجسم والمستوى تُلت؛ يعني م س بتساوي تُلت. عاوزين نعرَف كل قيم قوة الاحتكاك الممكنة من أقل قيمة لأكبر قيمة.

طيب دلوقتي إحنا عندنا المُستوى أفقي خشن، وإحنا عارفين إن لكل فعل رد فعل. فبالتالي هيكون فيه رد فعل من المستوى على الجسم. رد الفعل ده بيكون غير معلوم الاتجاه؛ لأن المستوى بتاعنا خشن، واللي بنسميه رد الفعل المحصِّل. إن رد الفعل المحصل ده هو ر شرطة. وهنحلله لمركِّبتين متعامدتين؛ واحدة عمودية على المستوى اللي هي ر أو رد الفعل العمودي، والمركبة التانية موازية للمستوى واللي هي قوة الاحتكاك.

طيب دلوقتي إحنا الجسم ده في حالة اتزان نهائي. يبقى قوة الاحتكاك هنا بتكون ح س أو قوة الاحتكاك السكوني. ح س دي هي أكبر قوة احتكاك موجودة بين الجسم والسطح الخشن. اللي هي بتبقى موجودة وخلاص الجسم على وشك الحركة.

يبقى إحنا كده عندنا أقصى قوة احتكاك هي ح س. طيب وأقل قوة احتكاك؟ أقل قوة احتكاك هي اللي بتكون موجودة لما ما فيش أي قوى تؤثِّر على الجسم؛ علشان تحاول تغير من وضعه. فده معناه إن أدنى قوة احتكاك هتساوي صفر. إحنا بقى عاوزين نعرف قوة الاحتكاك بتتراوح من صفر لكام؟ فهنبدأ نوجد ح س. ح س بتساوي م س في ر. م س عندنا بتساوي تُلت. ومن الاتِّزان عندنا رد الفعل العمودي بيساوي الوزن. يعني ر بتساوي ستة وتلاتين نيوتن. فده معناه إن ح س بتساوي م س اللي هي تُلت في ر اللي هي ستة وتلاتين. تُلت في ستة وتلاتين بتساوي اتناشر. يبقى ح س بتساوي اتناشر نيوتن. وده معناه إنه قيمة ح بتتراوح بين صفر واتناشر نيوتن؛ أي أن قوة الاحتكاك تنتمي للفترة المغلقة صفر واتناشر.

كده إحنا أوجدنا في صورة فترة كل قِيَم قوة الاحتكاك الممكنة. وتبقى هي دي الإجابة الصح: الفترة المغلقة صفر واتناشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.