فيديو: القسمة مع الصفر والواحد

يوضِّح الفيديو قواعد القسمة على ٠ وعلى ١.

٠٤:٢٨

‏نسخة الفيديو النصية

هنتكلم عن القسمة مع الصفر والواحد. هنتعلم إزاي نستعمل قواعد القسمة للقسمة مع الصفر، وعلى الواحد. هنلاحظ إنه هناك قواعد ممكن نستخدمها، لمّا يكون المقسوم عليه صفر، أو واحد. هبتدي الشرح بالمثال التالي.

عندي تلات ألعاب، وعاوز أحفظها في صناديق. وكل صندوق بيسع تلات ألعاب. فكم صندوق هحتاج؟

بما إنه ممكن أحطّ كل تلات لعب في صندوق واحد، إذن هستعمل قطع العدّ. وأكوّن مجموعات متساوية، في كلٍّ منها تلات قطع. هلاحظ إنه هيكون موجود مجموعة واحدة، فيها تلات قطع. يعني هحتاج إلى صندوق واحد. وبكده أقدر أقول إنه تلاتة على تلاتة هيساوي واحد. أو باستعمال رمز القسمة التاني، تلاتة على تلاتة هيساوي واحد. يعني هحتاج إلى صندوق واحد، عشان أحطّ فيه اللعب.

هنكمّل في الصفحة اللي جاية. هنتكلم عن قواعد القسمة. عند قسمة أيّ عدد على نفسه، ما عدا الصفر، هيكون الناتج واحد. يعني أربعة على أربعة هيساوي واحد. أو باستعمال رمز القسمة التاني، أربعة على أربعة هيساوي واحد.

تاني حاجة: عند قسمة أيّ عدد على واحد، هيكون الناتج العدد المقسوم نفسه. يعني أربعة على واحد هيساوي أربعة. أو باستعمال رمز القسمة التاني، أربعة على واحد هيساوي أربعة. تالت حاجة: عند قسمة العدد صفر، على أيّ عدد ما عدا الصفر، هيكون الناتج صفر. يعني مثلًا صفر على أربعة هيساوي صفر. أو باستعمال الرمز التاني للقسمة، صفر على أربعة هيساوي صفر. آخر حاجة: ما ينفعش نقسم على صفر.

هنكمل في الصفحة اللي جاية. تدريبات؛ رقم واحد: خمسة على واحد. بما إنه ناتج قسمة أيّ عدد على واحد، هيكون الناتج هو العدد نفسه؛ إذن خمسة على واحد هيساوي خمسة. رقم اتنين: صفر على واحد. بما إنه عند قسمة العدد صفر على أيّ عدد، هيكون الناتج صفر؛ إذن صفر على واحد هيساوي صفر.

رقم تلاتة: واحد على واحد. بما إنه عند قسمة أيّ عدد على واحد، هيكون الناتج العدد نفسه؛ إذن واحد على واحد هيساوي واحد. رقم أربعة: تسعة على واحد. برضو هيساوي تسعة. رقم خمسة: صفر على سبعة. بما إنه عند قسمة العدد صفر على أيّ عدد، هيكون الناتج صفر؛ إذن صفر على سبعة هيساوي صفر.

رقم ستة: عشرة على واحد. بما إنه عند قسمة أيّ عدد على واحد، هيكون الناتج العدد نفسه؛ إذن عشرة على واحد هيساوي عشرة. رقم سبعة: صفر على ستة. بما إنه ناتج قسمة العدد صفر على أيّ عدد، هيكون الناتج صفر؛ إذن صفر على ستة هيساوي صفر. رقم تمنية: سبعة على سبعة. بما إنه عند قسمة أيّ عدد على نفسه، هيكون الناتج واحد؛ إذن سبعة على سبعة هيساوي واحد.

سؤال رقم تسعة: حضر ست أشخاص إلى القاعة. وكان فيه ست كراسي فاضية. فما عدد الكراسي التي خُصصت لكل شخص؟ عشان أجيب عدد الكراسي التي خُصصت لكل شخص، هجيب ناتج قسمة ستة على ستة. وبما إنه ناتج قسمة أيّ عدد على نفسه، هيكون واحد؛ إذن ستة على ستة هيساوي واحد. يعني خُصص كرسي واحد لكل شخص.

وبكده هنكون اتعلّمنا قواعد القسمة مع الصفر والواحد. وعرفنا إنه عند قسمة أيّ عدد على نفسه، هيكون الناتج واحد. وعرفنا كمان إنه عند قسمة أيّ عدد على واحد، هيكون الناتج العدد نفسه. وعند قسمة العدد صفر على أيّ عدد، هيكون الناتج صفر. وأخيرًا ما ينفعش نقسم على صفر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.