فيديو: الضرب في ٧

يوضح الفيديو ما الضرب، وكيفية ضرب الأعداد في ٧ باستخدام النماذج، وأمثلةً عليها.

٠٥:١٥

‏نسخة الفيديو النصية

دلوقتي هنتكلّم عن الضرب في سبعة. الضرب هو عملية على عددين، يمكن وصفها بإنها جمع متكرر. والإشارة دي معناها الضرب. هنتعلّم إزاي نجيب ناتج الضرب في العدد سبعة. هبتدي الشرح بالمثال التالي. إذا كان في قطار مدينة الألعاب خمس عربات. وفي كل عربة سبع مقاعد. فكم شخصًا يمكنهم ركوب القطار في الوقت نفسه؟

عشان أجيب عدد الأشخاص اللي ممكن يركبوا القطر في الوقت نفسه، هجيب ناتج ضرب خمسة في سبعة. هنستعمل قطع العدّ لعمل نموذج مكوّن من خمس مجموعات، في كل مجموعة سبع قطع. المجموعة الأولى. المجموعة التانية. وهكمّل لحدّ ما أوصل لخمس مجموعات. لمّا هعدّ عدد القطع، هلاقي إنه ناتج ضرب خمسة في سبعة، هيساوي خمسة وتلاتين. وبكده أقدر أقول إنه خمسة وتلاتين شخصًا، ممكن يركبوا القطر في الوقت نفسه.

هنكمّل في الصفحة اللي جايّة. في صندوق ألعاب تمنية وعشرين سيارة، بألوان مختلفة. فإذا كان كل سبع سيارات لها اللون نفسه، فما عدد ألوان هذه السيارات؟

هفكر إزاي؟ عشان أجيب عدد الألوان، هفكّر إيه الرقم اللي هضربه في سبعة، هحصل على تمنية وعشرين. لأن سبعة بتمثّل عدد السيارات من نفس اللون، وتمنية وعشرين عدد السيارات كلها. هستعمل قطع العدّ. هكوّن مجموعات، في كل مجموعة سبع قطع، لحدّ ما أوصل لتمنية وعشرين قطعة.

يعني المجموعة الأولى، سبعة. المجموعة التانية، كده عندي أربعتاشر قطعة. المجموعة التالتة، كده عندي واحد وعشرين قطعة. والمجموعة الرابعة، هكون وصلت لتمنية وعشرين قطعة. وبكده أقدر أقول إنه أربعة في سبعة، هيساوي تمنية وعشرين. يعني هيكون موجود أربع ألوان للسيارات.

هنكمّل في الصفحة اللي جايّة. تدريبات: أجد ناتج الضرب مستعملًا النماذج أو ارسم صورة. رقم واحد: اتنين في سبعة. عشان أجيب ناتج ضرب اتنين في سبعة، هستعمل النماذج. هرسم مجموعتين، في كل مجموعة سبع قطع. المجموعة الأولى. المجموعة التانية. لمّا هعدّ عدد القطع، هلاقي إن ناتج ضرب اتنين في سبعة، هيساوي أربعتاشر.

تاني سؤال: سبعة في تمنية. عشان أجيب ناتج ضرب سبعة في تمنية، هرسم تمن مجموعات، في كل مجموعة سبع قطع. لمّا هعدّ عدد القطع، هلاقي إن ناتج ضرب سبعة في تمنية، هيساوي ستة وخمسين. هنكمّل في الصفحة اللي جايّة.

اكتب العدد المناسب في المربع. سبعة في كام هيساوي صفر؟ هفكّر، هلاحظ إنه أيّ عدد في صفر هيساوي صفر. إذن سبعة في صفر هيساوي صفر.

كام في سبعة يساوي تسعة وأربعين؟ هستعمل قطع العدّ، عشان أوصل لتسعة وأربعين قطعة. هرتّبهم في مجموعات، كل مجموعة فيها سبع قطع. وبعدين هعدّ عدد المجموعات. هلاحظ إن عشان أحصل على تسعة وأربعين قطعة، هحتاج سبع مجموعات، وفي كل مجموعة سبع قطع. إذن سبعة في سبعة، هيساوي تسعة وأربعين.

هنكمّل في الصفحة اللي جايّة. أعطت سلمى أربع أقلام لكل واحدة من صديقاتها السبع. فكم قلمًا أعطت سلمى لصديقاتها؟ عشان أجيب عدد الأقلام اللي ادّيتها سلمى لصديقاتها، هجيب ناتج ضرب أربعة في سبعة. وبكده هكوّن أربع مجموعات، في كل مجموعة سبع قطع؛ عشان أجيب ناتج ضرب أربعة في سبعة.

المجموعة الأولى. المجموعة التانية. المجموعة التالتة. المجموعة الرابعة. لمّا هعدّ عدد القطع في الأربع مجموعات، هلاحظ إنه ناتج ضرب أربعة في سبعة، هيساوي تمنية وعشرين. يعني سلمى أعطت تمنية وعشرين قلمًا لصديقاتها السبع.

وبكده هنكون اتعلّمنا إزاي نجيب ناتج الضرب في العدد سبعة، باستعمال النماذج.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.