فيديو: تمثيل متباينات القيمة المطلَقة بيانيًّا

نهال عصمت

يتناول الفيديو طريقة تمثيل متباينات القيمة المطلقة بيانيًّا، ومثالًا يوضِّح ذلك.

٠٤:٠٧

‏نسخة الفيديو النصية

تمثيل متباينات القيمة المطلقة بيانيًّا.

هنتكلّم عن طريقة تمثيل متباينات القيمة المطلقة بيانيًّا.

لمّا نيجي نمثّل متباينات القيمة المطلقة بيانيًّا هنلاقيها بتشبه تمثيل المتباينات الخطية. يعني في البداية هنبدأ نمثّل معادلة القيمة المطلقة المرتبطة بيانيًّا.

الخطوة التانية: هنبدأ نشوف حد المتباينة هيبقى متقطّعًا أم متصلًا. وده اللي بيحدّده علامة المتباينة؛ إذا كانت أكبر من، أو أصغر من، أو أكبر من أو يساوي، أو أصغر من أو يساوي.

الخطوة التالتة: هنبدأ نختار نقطة، ونعوّض بيها في متباينة القيمة المطلقة. والنقطة دي هي اللي هتحدّد لنا المنطقة اللي هنبدأ نظلّلها. هنبدأ نجيب صفحة جديدة، ونشوف مثال يوضّح أكتر.

مثّل المتباينة ص أكبر من أو تساوي القيمة المطلقة لـ س ناقص أربعة؛ بيانيًّا.

أول حاجة عشان نقدر نمثّل متباينة القيمة المطلقة بيانيًّا هنبدأ نمثّل معادلة القيمة المطلقة المرتبطة. وهي: ص تساوي القيمة المطلقة لـ س ناقص أربعة. هنبدأ نمثّل المعادلة المرتبطة بيانيًّا، هتبقى بالشكل ده.

بعد ما مثّلنا المعادلة المرتبطة ص تساوي القيمة المطلقة لـ س ناقص أربعة بيانيًّا، عايزين نحدّد هل حد المتباينة متقطّعًا أم متصلًا. هنلاحظ إن علامة المتباينة هي علامة أكبر من أو تساوي. معنى كده إن حد المتباينة هيبقى حد متصل.

الخطوة التالتة: هنبدأ نختار نقطة نعوّض بيها في المتباينة. ولْيكُن نقطة: صفر، وصفر؛ اللي هي نقطة الأصل. يبقى هنختار نقطة: صفر، وصفر، ونعوّض بيها في المتباينة.

المتباينة هي: ص أكبر من أو تساوي القيمة المطلقة لـ س ناقص أربعة. هنعوّض عن ص بصفر، وهنعوّض عن س بصفر. وناقص أربعة هتنزل زيّ ما هي. هل علامة المتباينة هتبقى أكبر من أو تساوي، أم لا؟

بعد كده عندنا في الطرف الأول هيفضل صفر زيّ ما هو، والطرف التاني هيبقى سالب أربعة. وبالفعل الصفر أكبر من أو يساوي السالب أربعة. يبقى نقدر نقول إن نقطة: صفر، وصفر هتبقى في المنطقة المظلّلة. هنبدأ نظلّل المنطقة بالشكل ده.

يبقى كده قدِرنا نمثّل المتباينة ص أكبر من أو تساوي القيمة المطلقة لـ س ناقص أربعة؛ بيانيًّا.

وبكده اتكلّمنا عن تمثيل متباينات القيمة المطلقة بيانيًّا. أول خطوة بنعملها: بنمثّل معادلة القيمة المطلقة المرتبطة؛ بيانيًّا. الخطوة التانية: بنحدّد إذا كان حد المتباينة متقطّعًا أم متصلًا. الخطوة التالتة: بنبدأ نختار نقطة، ونعوّض بيها في المتباينة. والنقطة دي بتحدّد لنا المنطقة التي يجب تظليلها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.