تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: كتابة معادلات الضرب وحلُّها

أحمد مدحت

يوضح الفيديو كيفية كتابة معادلات الضرب، وحلها عقليًّا، مع أمثلة توضيحية.

٠٦:٠١

‏نسخة الفيديو النصية

هنتكلّم عن كتابة معادلات الضرب وحلها. في الفيديو ده هنعرف إزّاي نكتب معادلة الضرب. بعد كده هنحل المعادلات عقليًّا من غير استخدام الآلة الحاسبة. وده هيكون من خلال أمثلة.

هنبدأ بالمثال الأول. في المثال الأول مي اشترت ثلاثة أقلام بمبلغ تسع جنيهات. فإذا كانت الأقلام متساوية الثمن، عايزين نعرف تمن القلم الواحد.

علشان نوجد تمن القلم الواحد، محتاجين نكتب معادلة. فهنبدأ نفسّر الجمل المعطاة عندنا. فمن خلال الجُمل المعطاة عندنا هنلاقي مي اشترت ثلاثة أقلام، والمبلغ اللي دفعته هو تسع جنيهات، والأقلام اللي اشتريتها متساوية في التمن. معنى كده إن تلات أمثال تمن القلم الواحد يساوي تسع جنيهات.

كده إحنا فسرنا الجمل اللي عندنا. بعد كده هنحدد المتغيّر علشان نقدر نكتب المعادلة. فهنلاقي إن تمن القلم الواحد هو اللي مجهول. فهنبدأ ندّيله رمز معيّن، ولْيكُن ق. فَـ ق كده هتمثّل تمن القلم الواحد. بعد كده هنكتب المعادلة. فإحنا عندنا تلات أمثال ثمن القلم الواحد يساوي تسع جنيهات. وكلمة أمثال أو أضعاف بتشير إلى عملية الضرب. معنى كده إن هيبقى تلات أمثال ثمن القلم الواحد، عبارة عن تلاتة في ق. يعني تلاتة ق. وبما إن تلات أمثال ثمن القلم الواحد يساوي تسع جنيهات، فهيبقى تلاتة ق يساوي تسعة.

كده إحنا كتبنا المعادلة اللي من خلالها هنقدر نوجد ثمن القلم الواحد. والمعادلة هي تلاتة ق يساوي تسعة. الخطوة اللي بعد كده إن إحنا هنحلّ المعادلة دي عقليًّا؛ يعني من غير استخدام الآلة الحاسبة. وده علشان نوجد تمن القلم الواحد، واللي بيمثله المتغيّر ق. فبالنسبة لِـ تلاتة ق معناها تلاتة في ق.

بالتالي علشان نوجد قيمة ق، هنشوف في جدول ضرب العدد تلاتة، إيه العدد اللي لمّا نضربه في تلاتة يكون حاصل الضرب هو تسعة. فهنلاقي تلاتة في تلاتة يساوي تسعة. وده معناه إن ق تساوي تلاتة. وبما إن ق تساوي تلاتة. وَ ق دي بتمثّل تمن القلم الواحد. فهيبقى تمن القلم الواحد تلات جنيهات.

بكده في المثال ده أول حاجة كتبنا المعادلة اللي من خلالها هنقدر نوجد تمن القلم الواحد. وكانت المعادلة دي معادلة ضرب. والمعادلة هي تلاتة ق يساوي تسعة. بعد كده حلينا المعادلة دي عقليًّا؛ يعني من غير استخدام الآلة الحاسبة. وقدرنا نوجد قيمة ق اللي بتمثّل تمن القلم الواحد.

بعد كده هنشوف مثال تاني. عندنا في المثال التاني عدد أشجار التفاح في مزرعة عمر يساوي أربع أمثال عدد أشجار التفاح في مزرعة علي. فإذا كان عدد أشجار التفاح في مزرعة عمر تمنية وعشرين شجرة. عايزين نعرف كام شجرة تفاح في مزرعة علي.

أول حاجة محتاجين نكتب المعادلة اللي من خلالها نقدر نوجد عدد أشجار التفاح اللي في مزرعة علي. بالتالي هنحتاج نفسّر الجمل والعبارات المعطاة. فمن خلال الجمل المعطاة هنلاقي إن عدد أشجار التفاح في مزرعة عمر أربع أمثال عدد أشجار التفاح في مزرعة علي. وكمان عندنا إن عدد أشجار التفاح في مزرعة عمر تمنية وعشرين شجرة. معنى كده إن هيبقى تمنية وعشرين شجرة، واللي هو عدد أشجار التفاح اللي في مزرعة عمر. يساوي أربع أمثال عدد أشجار التفاح اللي في مزرعة علي.

كده إحنا قدرنا نستفيد من الجُمَل المعطاة عندنا. بعد كده علشان نكتب المعادلة عايزين نحدد المتغيّر اللي هيكون في المعادلة. فهنلاقي عدد أشجار التفاح اللي في مزرعة علي هو المجهول. فهنبدأ ندّيله رمز معيّن. ولْيكُن ت. بكده ت هتمثّل عدد أشجار التفاح اللي في مزرعة علي. بعد كده هنكتب المعادلة.

بعد كده هنكتب المعادلة. فبما إن تمنية وعشرين شجرة بيساوي أربع أمثال عدد أشجار التفاح في مزرعة علي. وأمثال دي بتشير إلى عملية الضرب. وعدد أشجار التفاح في مزرعة علي بنمثّلها بالمتغير ت. هتبقى المعادلة هي تمنية وعشرين يساوي أربعة في ت. يعني أربعة ت. بكده يبقى إحنا كتبنا المعادلة.

بكده إحنا أوجدنا المعادلة. بعد كده هنحل المعادلة دي علشان نوجد قيمة ت واللي بتمثّل عدد أشجار التفاح اللي في مزرعة علي. فهنحل المعادلة دي عقليًّا من غير استخدام الآلة الحاسبة. فبما إن أربعة ت معناها أربعة في ت. فهنشوف في جدول ضرب العدد أربعة إيه العدد اللي لمّا نضربه في أربعة يكون حاصل الضرب هو تمنية وعشرين. فهنلاقي تمنية وعشرين يساوي أربعة في سبعة. معنى كده إن ت تساوي سبعة.

كده إحنا جبنا قيمة ت اللي بتمثّل عدد أشجار التفاح اللي في مزرعة علي. يعني هيبقى عدد أشجار التفاح في مزرعة علي هو سبع أشجار.

بعد كده هنشوف المثال التالث. في المثال التالت عندنا إن عُمْر كريم ضعف عُمْر شادي. فإذا كان عُمْر كريم عشرين عام. عايزين نعرف كم عمر شادي.

أول حاجة هنكتب المعادلة اللي من خلالها هنقدر نوجد عمر شادي. فهنبدأ نفسر الجمل اللي عندنا. فهنلاقي إن عمر كريم ضعف عُمر شادي. وعُمر كريم عشرين عام. فهيبقى عشرين عام واللي هو عمر كريم يساوي ضعف عمر شادي. بعد كده هنحدد المتغيّر اللي هيكون في المعادلة. فبالنسبة للمجهول هو عمر شادي. فهندّيله رمز معيّن ولْيكُن ع. بكده ع هتمثّل عمر شادي.

بعد كده هنكتب المعادلة. فإحنا عندنا عشرين عام بيساوي ضِعف عمر شادي. وضعف عمر شادي معناها اتنين في عمر شادي. وعمر شادي بنرمز له بالرمز ع. يعني ضعف عمر شادي عبارة عن اتنين في ع. واتنين في ع هي هي اتنين ع. يعني المعادلة هتبقى عشرين يساوي اتنين ع.

كده إحنا كتبنا المعادلة. بعد كده هنحل المعادلة دي عقليًّا من غير استخدام الآلة الحاسبة؛ علشان نوجد قيمة ع واللي بتمثّل عمر شادي. فبالنسبة لِـ اتنين ع معناها اتنين في ع. فهنشوف في جدول ضرب العدد اتنين، إيه العدد اللي لمّا نضربه في اتنين يكون حاصل الضرب هو عشرين. فهنلاقي عشرين تساوي اتنين في عشرة. معنى كده إن ع تساوي عشرة. كده إحنا جِبنا قيمة ع. وبما إن ع بتمثّل عمر شادي فهيبقى عُمر شادي هو عشرة أعوام.

بكده يبقى إحنا من خلال الفيديو ده عرفنا إزّاي نكتب معادلات الضرب، بعد كده حلينا المعادلات دي عقليًّا من غير استخدام الآلة الحاسبة.