تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: وحدات الكتلة في النظام المتري

أحمد لطفي

يوضح الفيديو تعريف الكتلة، والوحدات المترية المختلفة المستخدمة لقياس الكتلة، وكيفية إيجاد الوحدة المترية المناسبة لكتلة بعض الأمثلة المختلفة.

٠٤:٢٥

‏نسخة الفيديو النصية

هنتكلّم عن وحدات الكتلة في النظام المتري. وهنعرف إيه هي الكتلة، وإيه هي الوحدات المختلفة المستخدمة لقياس الكتلة في النظام المتري.

في البداية كتلة الشيء هي مقدار ما يحتويه من مادة. يعني عشان أقدر أقيس كتلة أيّ شيء، هشوف الشيء ده بيقدر يحتوي على مادة قدّ إيه. وعشان نقدر نقيس الكتلة في النظام المتري، عندنا تلات وحدات للقياس. أول وحدة هي ملليجرام، وبنقدر نختصرها ونكتبها على الشكل ده. ولو عايزين ناخد نموذج يعبّر عن واحد ملليجرام تقريبًا، فهيكون ذرّة الملح.

تاني وحدة من وحدات قياس الكتلة في النظام المتري هي جرام، وبنقدر نختصرها ونكتبها على الشكل ده. ولو عايزين نشوف نموذج يعبّر عن تقريبًا واحد جرام، فهيكون مشبك الورق. ولو عايزين نعرف العلاقة بين الجرام والملليجرام، فهنقول إن واحد جرام هيساوي ألف ملليجرام.

وتالت وحدة من وحدات قياس الكتلة في النظام المتري هي كيلوجرام، وممكن نختصرها ونكتبها على الشكل ده. ولو عايزين نموذج يعبّر عن تقريبًا واحد كيلوجرام، فهيكون كتاب قصصي. ولو عايزين نعرف العلاقة بين الكيلوجرام والجرام، فهنقول إن واحد كيلوجرام هيساوي ألف جرام. ويبقى كده عرفنا التلات وحدات المستخدمين لقياس الكتلة في النظام المتري. وهُم: أول وحدة هي الملليجرام، تاني وحدة هي الجرام، تالت وحدة هي الكيلوجرام.

في صفحة جديدة هناخد مثال. لو عندنا مثال بالشكل ده. مطلوب نكتب الوحدات المترية للكتلة اللي بتستخدم في قياس الآتي، ونقدّر الكتلة. أول حاجة كتلة الورقة. عايزين نقدر نكتب الوحدة المترية اللي مستخدمة في قياس كتلة الورقة. في البداية هنلاحظ إن الورقة كتلتها أكيد هتكون أكبر من كتلة مشبك الورق. لكن أكيد كتلة الورقة هتكون أصغر من كتلة الكتاب القصصي.

وبما إن كتلة مشبك الورق بتساوي تقريبًا واحد ملليجرام، وكتلة الكتاب القصصي بتساوي تقريبًا واحد كيلوجرام. يعني كتلة الورقة هتكون أكبر من واحد ملليجرام، وأصغر من واحد كيلوجرام. يعني الوحدة المترية المستخدمة لقياس كتلة الورقة، هتكون هي الجرام. ولو عايزين نقدّر كتلة الورقة، فكتلة الورقة هتكون بتساوي حوالي ستين جرام. وبكده نكون قدرنا نوجد الوحدة المترية المستخدمة لقياس كتلة الورقة، وقدّرنا كتلة الورقة.

تاني حاجة محتاجين نكتب الوحدة المترية للكتلة اللي بتستخدم في قياس كتلة التليفزيون. أول حاجة هنلاحظ إن كتلة التليفزيون هتكون أكبر من كتلة الكتاب القصصي. وبما إن الكتاب القصصي بيساوي تقريبًا واحد كيلوجرام، يعني كتلة التليفزيون هتكون أكبر من واحد كيلوجرام. وبالتالي الوحدة المترية المستخدمة لقياس كتلة التليفزيون، هتكون هي الكيلوجرام. ولو عايزين نقدّر كتلة التليفزيون، فكتلة التليفزيون هتساوي حوالي عشرين كيلوجرام. وبكده نكون قدرنا نوجد الوحدة المترية المستخدمة لقياس كتلة التليفزيون، وقدرنا نقدّر كتلته.

وفي النهاية نكون عرفنا إيه هي وحدات الكتلة المستخدمة في النظام المتري. وهُم تلات وحدات: أول وحدة الملليجرام، تاني وحدة الجرام، وتالت وحدة الكيلوجرام. وقدرنا نوجد الوحدات المترية المستخدمة لقياس كتلة بعض الأمثلة المختلفة.