فيديو: حركة المقذوفات

طار نسر أفقيًّا بسرعة 4.00m/s وكانت هناك سمكة تتلوَّى في مخلبه حتى سقطت في بحيرة تبعُد 9.00m لأسفل. احسب سرعة السمكة بالنسبة إلى الماء عند اصطدامها بالماء. استخدِم القيمة 9.80m/s^2 لعجلة الجاذبية.

٠٢:٤٧

‏نسخة الفيديو النصية

طار نسر أفقيًّا بسرعة أربعة متر على الثانية. وكانت هناك سمكة تتلوّى في مِخلبه حتى سقطت في بحيرة تبعُد تسعة متر لأسفل. احسب سرعة السمكة بالنسبة إلى الماء عند اصطدامها بالماء. استخدِم القيمة تسعة وتمانين من المية متر على الثانية تربيع لعجلة الجاذبية.

فإحنا عندنا نسر مصطاد سمكة. كانت سرعته الأفقية بتساوي أربعة متر على الثانية. والسمكة اللي كان ماسكها النسر كانت على ارتفاع من المَيَّة بيساوي تسعة متر. فالسمكة دي عرفت تهرب من النسر، ووقعت في المَيَّة. والمطلوب منّنا إن إحنا نعرف سرعة السمكة لمّا وصلت المَيَّة. فعلشان نجيب السرعة دي، هنحتاج نعرف مركّباتها، اللي همّ المركّبة الأفقية اللي في اتجاه الـ 𝑥، والمركّبة الرأسية اللي في اتجاه الـ 𝑦.

فبما إن السرعة الابتدائية للسمكة كانت هي هي السرعة الابتدائية للنسر، فده معناه إن السرعة الابتدائية للسمكة كانت في الاتجاه الأفقي برضو. وبتساوي أربعة متر على الثانية. أمَّا مركّبة السرعة في الاتجاه 𝑦، كانت بصفر. ولكن في الاتجاه الرأسي 𝑦 ،كانت قوة الجاذبية بتأثّر على السمكة. فالسمكة كانت بتتسارع في الاتجاه الرأسي 𝑦 بعجلة الجاذبية. فعلشان نجيب مركّبة السرعة النهائية في اتجاه 𝑦، هنستخدم قانون الحركة اللي بيقول: إن السرعة النهائية تربيع بتساوي السرعة الابتدائية تربيع زائد اتنين في، عجلة الجاذبية في المسافة الرأسية. وبما إن السرعة الابتدائية في الاتجاه 𝑦 كانت بتساوي صفر، فممكن نشيلها من المعادلة.

وبعدين علشان نعرف نجيب مركّبة السرعة النهائية في اتجاه 𝑦، هناخد الجذر التربيعي للطرفين. فهنلاقي إن مركّبة السرعة النهائية في الاتجاه الرأسي بتساوي الجذر التربيعي لاتنين في، عجلة الجاذبية في المسافة الرأسية. وبالتعويض، هنطلّع إن مركّبة السرعة النهائية في الاتجاه الرأسي بتساوي الجذر التربيعي لاتنين في، تسعة وتمنية من العشرة متر على الثانية تربيع في تسعة متر. فده هيدّينا إن 𝑉 𝑓 𝑦 بتساوي تلتاشر وتمنية وعشرين من المية متر على الثانية. فكده إحنا جِبنا مركّبة السرعة النهائية في الاتجاه الرأسي.

فعلشان نطلّع مركّبة السرعة النهائية في الاتجاه الأفقي، هنلاقي إن ما فيش أيّ قوّة بتأثّر على السمكة في الاتجاه الأفقي. فده معناه إن ما فيش أيّ عجلة بتأثّر على السمكة في الاتجاه الأفقي. فنقدر كده نقول: إن مركّبة السرعة في الاتجاه الأفقي هتفضل ثابتة، وهتساوي أربعة متر على الثانية.

فالسرعة النهائية بتساوي الجذر التربيعي لمركّبة السرعة النهائية في الاتجاه 𝑥 تربيع، زائد مركّبة السرعة النهائية في الاتجاه 𝑦 تربيع. فلمّا نعوّض بمركّبات السرعة اللي إحنا طلّعناها، هنلاقي إن السرعة النهائية بتساوي الجذر التربيعي لأربعة متر على الثانية تربيع، زائد تلتاشر وتمنية وعشرين من المية متر على الثانية تربيع. فده هيطلّع لنا إن السرعة النهائية بتساوي تلتاشر وتسعة من العشرة متر على الثانية.

وبكده نبقى عرفنا نطلّع السرعة النهائية للسمكة لمّا وصلت المية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.