نسخة الفيديو النصية
اكتب الحدود الثلاثة التالية في المتتابعة الحسابية: تلاتة وتلاتة من عشرة، وأربعة واتنين من عشرة، وخمسة وواحد من عشرة، وستة، وهكذا.
فلمّا نيجي نشوف المتتابعة الحسابية اللي عندنا في السؤال، فهنلاحظ إن عندنا الحد الأول تلاتة وتلاتة من عشرة. وبعد كده الحد التاني أربعة واتنين من عشرة. فمعنى كده إن تلاتة وتلاتة من عشرة عشان تبقى أربعة واتنين من عشرة، يبقى أضفنا ليها تسعة من عشرة. وبنفس الطريقة من الحد التاني للحد التالت، برضو أضفنا تسعة من عشرة. وهكذا من خمسة وواحد من عشرة إلى ستة، برضو أضفنا تسعة من عشرة. فمعنى كده إن نمط المتتابعة الحسابية اللي عندنا، هو إننا بنضيف تسعة من عشرة إلى الحد اللي قبله.
فبالتالي عشان نكتب الحدود التلاتة التالية في المتتابعة الحسابية، يبقى هنيجي عند ستة، وهنضيف عليها تسعة من عشرة. فلمّا نجمع ستة زائد تسعة من عشرة، هتبقى بتساوي ستة وتسعة من عشرة.
وبنفس الطريقة لمّا نكمّل، هنضيف على الحد ده تسعة من عشرة، فيبقى الحد إلى بعده سبعة وتمنية من عشرة. وهكذا هنضيف برضو تسعة من عشرة، فهيبقى الحد اللي بعده تمنية وسبعة من عشرة.
وبالتالي هتبقى الحدود التلاتة التالية في المتتابعة الحسابية هم: ستة وتسعة من عشرة، وسبعة وتمنية من عشرة، وتمنية وسبعة من عشرة.
