فيديو: تحديد التغيُّر في الإنتروبي نتيجة التغيُّر في الطور

أوجد التغيّر في إنتروبي كمية من البخار كتلتها 20gm عند درجة حرارة ‎100°c عندما تتكثف إلى ماء عند نفس درجة الحرارة. استخدم القيمة 2257kJ/kg للحرارة الكامنة لتبخر الماء.

٠٢:٣٤

‏نسخة الفيديو النصية

أوجد التغيّر في إنتروبي كمية من البخار كتلتها عشرين جرام عند درجة حرارة مية سلزيوس عندما تتكثّف إلى ماء عند نفس درجة الحرارة. استخدم القيمة ألفين ميتين سبعة وخمسين كيلوجول على الكيلوجرام للحرارة الكامنة لتبخّر الماء.

فإحنا عندنا كمية من البخار كانت كتلتها عشرين جرام، ودرجة حرارتها مية درجة سلزيوس. والبخار ده فضل يتكثّف لحدّ ما وصل لمَيّة درجتها بتساوي مية سلزيوس برضو. ومعطى عندنا إن الحرارة الكامنة لتبخّر الماء بتساوي ألفين ميتين سبعة وخمسين كيلوجول على كيلوجرام. والمطلوب منّنا إن إحنا نعرف التغيّر اللي حصل في الإنتروبي في العملية دي.

فالتغيّر في الإنتروبي بيساوي تكامل 𝑑 𝑄 على 𝑇، والـ 𝑄 دي بتعبّر عن الطاقة الحرارية اللي داخلة المنظومة بتاعتنا. فبما إن طول العملية بتاعتنا درجة الحرارة كانت ثابتة، فنقدر نطلّعها برّه التكامل. فهنلاقي إن التغيّر في الإنتروبي بيساوي واحد على 𝑇، مضروب في تكامل 𝑑 𝑄. والتكامل 𝑑 𝑄 ده هيدّينا الفرق في كمية الطاقة الحرارية اللي دخلت المنظومة بتاعتنا. فهنلاقي إن التغيّر في الإنتروبي بيساوي Δ 𝑄 على 𝑇.

وبما إن الحرارة الكامنة للتبخّر هي هي الحرارة الكامنة للتكثّف. فده معناه إن الحرارة الكامنة للتكثّف بتساوي برضو ألفين ميتين سبعة وخمسين كيلوجول على كيلوجرام. وبما إن الحرارة الكامنة للتكثّف دي هي كمية الطاقة الحرارية المطلوبة لتحويل واحد كيلوجرام من الغاز لسائل. فده معناه إن كمية الطاقة الحرارية اللي هنحتاجها علشان نعمل العملية دي بتساوي الحرارة الكامنة للتكثّف مضروبة في الكتلة.

ولمّا نعوّض هنلاقي إن Δ 𝑄 بتساوي ألفين ميتين سبعة وخمسين كيلوجول على كيلوجرام في عشرين جرام. نقدر نعوّض مكان الجرام بعشرة أُس سالب تلاتة كيلوجرام، ونطلّع إن الـ Δ 𝑄 بتساوي خمسة وأربعين ألف ومية وأربعين جول.

فنقدر دلوقتي نعوّض بالـ Δ 𝑄 دي في القانون بتاع التغيّر في الإنتروبي. فهنلاقي إن التغيّر في الإنتروبي بيساوي خمسة وأربعين ألف ومية وأربعين جول مقسومة على مية درجة سلزيوس. ولكن لازم نحوّل السلزيوس لكلفن، وده هيحصل بإننا نزوّد على المية درجة دول ميتين تلاتة وسبعين؛ فده هيدّينا درجة الحرارة بالكلفن. فده هيطلّع لنا إن التغيّر في الإنتروبي تقريبًا بيساوي مية وعشرين جول على كلفن.

وبكده نبقى عرفنا نطلّع التغيّر في الإنتروبي لكمية من البخار تكثّفت لماء.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.