فيديو: تقدير مجموع بعض الأعداد الكسرية بالتقريب

بتقريب كل كسر لأقرب عدد صحيح، قدِّر مجموع ٣/١ ٣، ١٢/١ ٤، ١١/٨ ٩. [أ] ١٦ [ب] ١٧ [ج] ١٨ [د] ١٩

٠٢:٤١

‏نسخة الفيديو النصية

بتقريب كل كسر لأقرب عدد صحيح، قدّر مجموع تلاتة وواحد على تلاتة، وأربعة وواحد على اتناشر، وتسعة وتمنية على حداشر. ومعطى عندنا الاختيارات؛ الاختيار الأول: ستاشر. الاختيار التاني: سبعتاشر. الاختيار التالت: تمنتاشر. والاختيار الرابع: تسعتاشر.

يعني عندنا تلات أعداد كسرية، ومطلوب إننا نقدر مجموعهم، يعني مطلوب إننا نجمعهم. فهيبقى عندنا تلاتة وواحد على تلاتة، زائد أربعة وواحد على اتناشر، زائد تسعة وتمنية على حداشر. وعشان نقدر مجموعهم، يبقى في الأول هنحتاج إننا نقرّب كل كسر لأقرب عدد صحيح.

وهنبدأ الأول نشوف العدد الكسري تلاتة وواحد على تلاتة. فهنلاحظ إنه بيقع ما بين تلاتة وأربعة. بعد كده هنشوف الكسر واحد على تلاتة أقرب إلى صفر ولّا أقرب إلى واحد. وبما إن هو واحد على تلاتة، يعني تلت فهو أقل من نص. فبالتالي هيبقى أقرب إلى صفر. فمعنى كده إن العدد الكسري تلاتة وواحد على تلاتة أقرب إلى تلاتة.

بعد كده هنشوف العدد الكسري أربعة وواحد على اتناشر. وهنلاحظ إنه بيقع ما بين أربعة وخمسة. بعد كده هنشوف الكسر واحد على اتناشر هل هو أقرب إلى صفر ولّا أقرب إلى واحد. فهنلاحظ إن واحد على اتناشر أقرب إلى صفر. وبالتالي هيبقى العدد الكسري أربعة وواحد على اتناشر أقرب إلى أربعة.

وآخر حاجة عندنا هنشوف العدد الكسري تسعة وتمنية على حداشر. واللي هنلاحظ إنه بيقع ما بين تسعة وعشرة. فعشان نعرف هو أقرب لتسعة ولّا عشرة، يبقى هنشوف الكسر اللي هو تمنية على حداشر. فهل هو أقرب إلى صفر ولّا أقرب إلى واحد. وبما إن تمنية على حداشر أقرب إلى واحد. فبالتالي هيبقى العدد الكسري تسعة وتمنية على حداشر أقرب إلى عشرة.

وبكده نكون قرّبنا كل الأعداد الكسرية لأقرب عدد صحيح. بعد كده هنبدأ نحسب. فهنجمع تلاتة زائد أربعة زائد عشرة. فلمّا نجمعهم هيبقى بيساوي سبعتاشر. فبالتالي هيبقى تقدير الناتج هو سبعتاشر. فلمّا نشوف الاختيارات هنلاقي إن الاختيار رقم اتنين هو الإجابة الصحيحة، واللي هو سبعتاشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.