فيديو: إيجاد قياس زاوية بمعلومية قياس الزاوية المكملة لها

إذا كان ∠ﺃ، ∠ﺏ زاويتين متتامتين، ∠ﺏ، ∠ﺟ زاويتين متكاملتين، وكان ق∠ﺃ = ٥١°، فما ق∠ﺟ؟

٠٢:٥١

‏نسخة الفيديو النصية

إذا كان زاوية أ وزاوية ب زاويتين متتامتين، وزاوية ب وزاوية ج زاويتين متكاملتين، وكان قياس الزاوية أ يساوي واحد وخمسين درجة؛ فما قياس الزاوية ج؟

وخلينا في الأول نفتكر إن الزاويتين المتتامتين هما الزاويتان اللي مجموع قياسهما تسعين درجة، وأما الزاويتين المتكاملتين فهما الزاويتين اللي مجموع قياسهما مية وتمانين درجة. وبما إن معطى عندنا في السؤال إن الزاوية أ والزاوية ب زاويتين متتامتين، فمعنى كده إن مجموع قياسهما بيساوي تسعين درجة؛ فبالتالي هيبقى قياس الزاوية أ زائد قياس الزاوية ب يساوي تسعين درجة.

ومعطى عندنا في السؤال إن قياس الزاوية أ يساوي واحد وخمسين درجة، فهنعوّض عن قياس الزاوية أ هنا بواحد وخمسين علشان نوجد قياس الزاوية ب، فهتبقى المعادلة: واحد وخمسين درجة زائد قياس الزاوية ب يساوي تسعين درجة.

وعشان نوجد قياس الزاوية ب يبقى هنطرح واحد وخمسين درجة من طرفَي المعادلة؛ فهيبقى الطرف الأيمن للمعادلة واحد وخمسين درجة زائد قياس الزاوية ب ناقص واحد وخمسين درجة بيساوي قياس الزاوية ب، وأما الطرف الأيسر للمعادلة فهيبقى تسعين درجة ناقص واحد وخمسين درجة؛ فلما نحسبها هتبقى بتساوي تسعة وتلاتين درجة. فكده يبقى أوجدنا قياس الزاوية ب، واللي بيساوي تسعة وتلاتين درجة.

بعد كده هنشوف إن معطى في السؤال الزاوية ب والزاوية ج زاويتين متكاملتين، فمعنى كده إن مجموع قياسهما بيساوي مية وتمانين درجة؛ وبالتالي هيبقى قياس الزاوية ب زائد قياس الزاوية ج بيساوي مية وتمانين درجة. وبما إننا أوجدنا قياس الزاوية ب اللي هو بيساوي تسعة وتلاتين درجة، فهنعوّض في المعادلة عن قياس الزاوية ب بتسعة وتلاتين درجة، فهتبقى المعادلة تسعة وتلاتين درجة زائد قياس الزاوية ج يساوي مية وتمانين درجة.

بعد كده عشان نوجد قياس الزاوية ج يبقى هنطرح تسعة وتلاتين درجة من طرفَي المعادلة؛ فهيبقى الطرف الأيمن للمعادلة تسعة وتلاتين درجة زائد قياس الزاوية ج ناقص تسعة وتلاتين درجة بيساوي قياس الزاوية ج، وأما الطرف الأيسر للمعادلة هيبقى مية وتمانين درجة ناقص تسعة وتلاتين درجة، فلما نحسبها هتساوي مية واحد وأربعين درجة، وهو ده المطلوب عندنا في السؤال؛ فبالتالي هيبقى قياس الزاوية ج بيساوي مية واحد وأربعين درجة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.