فيديو: امتحان الاستاتيكا للعام السابق • ٢٠١٨/٢٠١٧ • السؤال الرابع عشر

امتحان الاستاتيكا للعام السابق • ٢٠١٨/٢٠١٧ • السؤال الرابع عشر

٠٢:٤٥

‏نسخة الفيديو النصية

إذا كان هناك نظام مكوّن من كتلتين: تلاتة كيلوجرام، وخمسة كيلوجرام. وكانت المسافة بين الكتلتين تمنية متر. فما المسافة بين مركز ثقل النظام والكتلة الأولى؟ اكتب إجابتك بالمتر.

عندنا نظام مكوّن من كتلتين: خمسة، وتلاتة كيلوجرام. المسافة بين الكتلتين دول تمنية متر. عاوزين نعرف بُعد مركز ثقل النظام عن الكتلة الأولى.

هنعتبر إن الخط الواصل بين الكتلتين بيقع على محور السينات. وهنعتبر إن نقطة الأصل: صفر، وصفر؛ بتقع عند الكتلة الأولى اللي هي تلاتة كيلوجرام. فبالتالي هتكون س واحد، اللي هي عند الكتلة الأولى، بتساوي صفر. وَ س اتنين، اللي هي عند الكتلة التانية، بتساوي طول الخط الواصل اللي هو تمنية. وَ ك واحد عندنا هي تلاتة كيلوجرام، وَ ك اتنين هي خمسة كيلوجرام.

وباستخدام العلاقة: س م تساوي س واحد في ك واحد، زائد س اتنين في ك اتنين؛ على ك واحد زائد ك اتنين. هنعوّض فيها بقيم س واحد، وَ س اتنين، وَ ك واحد، وَ ك اتنين. فهتساوي … س واحد في ك واحد؛ اللي هي صفر في تلاتة. زائد … س اتنين في ك اتنين؛ اللي هي تمنية في خمسة. على … ك واحد زائد ك اتنين؛ تلاتة زائد خمسة.

صفر في تلاتة بتساوي صفر، وتمنية في خمسة بتساوي أربعين. على التمنية، يبقى هتساوي خمسة متر. فده معناه إن مركز ثقل النظام بيقع على بعد خمسة متر من الكتلة الأولى. يعني مركز ثقل النظام تقريبًا هيكون موجود هنا. وبيقسم الخط الواصل بين الكتلتين لخمسة متر، وتلاتة متر. وهو على بُعد خمس أمتار من الكتلة الأولى.

وفيه ملاحظة لازم ناخد بالنا منها. الملاحظة هي إن الكتلة الصغيرة مركز ثقل النظام بيبعد عنها مسافة كبيرة. والعكس؛ الكتلة الكبيرة مركز ثقل النظام بيبعد عنها مسافة صغيرة. يعني إحنا عندنا الكتلة الصغيرة، اللي هي تلاتة كيلوجرام، مركز الثقل بيبعد عنها خمسة متر. والكتلة الكبيرة، اللي هي خمسة كيلوجرام، مركز الثقل بيبعد عنها مسافة صغيرة اللي هي تلاتة متر.

وبكده نكون أوجدنا المطلوب عندنا في السؤال، وهو بُعد مركز ثقل النظام عن الكتلة الصغيرة، واللي طلع بيساوي خمسة متر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.