فيديو: جمع ثلاثة أعداد كلٌّ منها مكوَّن من رقمين

يوضح الفيديو كيفية جمع ثلاثة أعداد كلٌّ منها مكوَّن من رقمين، باستخدام إكمال العشرة وجمع الأعداد المتساوية، وأمثلةً عليها.

٠٥:٠٢

‏نسخة الفيديو النصية

جمع ثلاثة أعداد من رقمين.

في الفيديو ده، هنتعلّم إزاي بنجمع تلات أعداد كلّ عدد منها مكوَّن من رقمين. لو عاوزين نوجد مجموع تلات أعداد بنعمل إيه؟ فيه أكتر من طريقة لده.

يعني مثلًا لو عاوزين نوجد مجموع ستة وتلاتين، زائد أربعتاشر، زائد أربعة وعشرين، فالطريقة الأولى للحلّ هي إكمال العشرة. ودي بإننا بنشوف الرقمين في الآحاد اللي مجموعهم عشرة، ونجمعهم الأول. وبعدين نجمع الرقم التالت معاهم. فلو كتبنا السؤال بشكل رأسي، وفكّرنا إيه الرقمين اللي بيكمّلوا عشرة مع بعض، هيبقى ستة، وأربعة. فهنقول: ستة زائد أربعة بيساوي عشرة. بعدين هنجمع عليهم الرقم التالت. فهنقول: عشرة زائد أربعة هيساوي أربعتاشر. فنكتب أربعة في الناتج في الآحاد، ونضيف واحد فوق العشرات. بعدين نجمع العشرات، فيبقى واحد، زائد تلاتة، زائد واحد، زائد اتنين بيساوي سبعة. فنكتب سبعة في العشرات. فهيبقى الناتج أربعة وسبعين.

الطريقة التانية: جمع الأعداد المتساوية. يعني هنشوف لو فيه رقمين متساويين، ونجمعهم الأول. وبعدين نجمع مع مجموعهم الرقم التالت. ففي الحالة دي، هنجمع أربعة زائد أربعة. أربعة زائد أربعة هيساوي تمنية. بعدين نجمع معاها الستة. هيبقى تمنية زائد ستة بيساوي أربعتاشر. فنكتب أربعة في الناتج في الآحاد، ونكتب واحد فوق العشرات. وبعدين نجمع العشرات، فهيبقى واحد، زائد تلاتة، زائد واحد، زائد اتنين بيساوي سبعة. فهنكتبها في الناتج في العشرات. يبقى ستة وتلاتين، زائد أربعتاشر، زائد أربعة وعشرين من الطريقتين بيساوي أربعة وسبعين.

نتنقل لصفحة تانية، ونحلّ مثال تاني. عاوزين نوجد أربعتاشر، زائد تسعتاشر، زائد واحد وتلاتين.

نكتب السؤال بشكل رأسي. عشان نحلّ السؤال ده، هنستخدم طريقة إكمال العشرة. يبقى هنجمع تسعة وواحد، فهيبقى تسعة زائد واحد بيساوي عشرة. بعدين عشرة زائد أربعة هيساوي أربعتاشر. فهنكتب أربعة في الناتج في الآحاد، ونضيف واحد فوق العشرات. بعدين نجمع العشرات، فهيبقى واحد، زائد واحد، زائد واحد، زائد تلاتة هيساوي ستة. فنكتب في الناتج في العشرات ستة. يبقى أربعتاشر، زائد تسعتاشر، زائد واحد وتلاتين بيساوي أربعة وستين.

مثال تاني: عاوزين نوجد خمسة وعشرين، زائد تلاتة وتلاتين، زائد تلتاشر.

نكتب السؤال بشكل رأسي. عشان نحلّ السؤال ده، هنستخدم طريقة جمع الأعداد المتساوية. فهنجمع تلاتة وتلاتة، فهيبقى تلاتة زائد تلاتة بيساوي ستة. بعدين نجمع عليها الخمسة. ستة زائد خمسة هيساوي حداشر. فهنكتب واحد في الناتج في الآحاد، ونضيف واحد فوق العشرات. بعدين نجمع العشرات، فيبقى واحد، زائد اتنين، زائد تلاتة، زائد واحد هيساوي سبعة. فنكتب سبعة في الناتج في العشرات. يبقى خمسة وعشرين، زائد تلاتة وتلاتين، زائد تلتاشر بيساوي واحد وسبعين.

وبكده نبقى خلّصنا الفيديو ده. اللي اتعلّمنا فيه إزاي بنجمع تلات أعداد كلّ عدد منها مكوَّن من رقمين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.