فيديو السؤال: إيجاد مساحة مربع بمعلومية طول ضلعه الرياضيات

نسخة الفيديو النصية

أوجد مساحة المربع الذي طول ضلعه سبعة سنتيمتر.

وخلينا نفتكر إن المربع هو شكل رباعي جميع أضلاعه متساوية، فلو عندنا مربع بالشكل ده، وعايزين نوجد مساحته؛ فبيبقى مساحة المربع بتساوي طول الضلع في نفسه. فمثلًا لو هنفرض إن طول ضلع المربع هنرمز له بالرمز ل، وبما إن جميع أضلاع المربع متساوية، هيبقى الأربع أضلاع ليها الطول نفسه؛ فبالتالي هتبقى مساحة المربع اللي هي طول الضلع في نفسه، يعني هتساوي ل في ل.

ومُعطى عندنا في السؤال إن طول ضلع المربع سبعة سنتيمتر، فعشان نوجد مساحة المربع يبقى هنعوّض عن طول الضلع بسبعة؛ فهيبقى عندنا مساحة المربع بتساوي سبعة في سبعة، فلمّا نحسب سبعة في سبعة هتساوي تسعة وأربعين. وبما إننا بنوجد مساحة؛ فبالتالي هتبقى الوحدة بالسنتيمتر المربع.

فمعنى كده إن مساحة المربع اللي طول ضلعه سبعة سنتيمتر، بتساوي تسعة وأربعين سنتيمتر مربع.