نسخة الفيديو النصية
كثافة الذهب تساوي تسعتاشر وتلاتة من العشرة جرام على السنتيمتر تكعيب. ما مقدار الكثافة بوحدة الكيلوجرام على المتر المكعب؟
فإحنا عندنا الكثافة بوحدة الجرام على السنتيمتر مكعب. وعايزين نحوّل وحدتها للكيلوجرام على المتر المكعب. والتحويلة دي هتتقسم نصين. النص الأولاني عشان نحوّل الجرام، للكيلوجرام. والنص التاني إن إحنا نحوّل السنتيمتر مكعب، للمتر مكعب. فعلشان نحوّل من جرام لكيلوجرام، هنلاقي إن الجرام بيساوي عشرة أُس سالب تلاتة كيلوجرام. وعلشان نحوّل من السنتيمتر للمتر، هنلاقي إن السنتيمتر بيساوي عشرة أُس سالب اتنين متر.
فلو عملنا تكعيب لطرفين المعادلة، فهنطلّع إن السنتيمتر تكعيب بيساوي عشرة أُس سالب اتنين متر، الكل تكعيب. فلمّا نوزّع التكعيب على العشرة أس سالب اتنين والمتر. هنلاقي إن السنتيمتر تكعيب بيساوي عشرة أُس سالب ستة متر تكعيب. فنقدر دلوقتي نعوّض بتحويلة الجرام للكيلوجرام، وتحويلة السنتيمتر تكعيب لمتر تكعيب، في معادلة الكثافة.
فهنلاقي إن الكثافة بتساوي تسعتاشر وتلاتة من العشرة؛ في عشرة أُس سالب تلاتة كيلوجرام، على عشرة أُس سالب ستة متر تكعيب. اللي لمّا هنحسبها، هنلاقي إن الكثافة بتساوي تسعتاشر ألف وتلتمية كيلوجرام عَ المتر تكعيب.
وبكده يبقى عرفنا نحوّل وحدة الكثافة؛ من جرام على السنتيمتر تكعيب، لكيلوجرام على المتر تكعيب.