فيديو: تقدير المقادير ذات الأعداد الكسرية

قدِّر ٨/٣ ٥ (١١/٢ ٧ − ٤/١ ٥). [أ] ٥ [ب] ٦ [ج] ١٠ [د] ١٢

٠٢:٣٥

‏نسخة الفيديو النصية

قدِّر خمسة وتلاتة على تمنية في، سبعة واتنين على حداشر، ناقص خمسة وواحد على أربعة. ومعطى عندنا اختيارات؛ الاختيار الأول: خمسة. والاختيار التاني: ستة. والاختيار التالت: عشرة. والاختيار الرابع: اتناشر.

وعشان نقدّر الناتج، يبقى في الأول هنحتاج إننا نقرَّب كل كسر لأقرب عدد صحيح. فهنبدأ نقرَّب كل عدد كسري عندنا لأقرب عدد صحيح. وهنبدأ الأول بخمسة وتلاتة على تمنية. فهنلاحظ إن العدد الكسري خمسة وتلاتة على تمنية بيقع ما بين خمسة وستة. بعد كده هنشوف الكسر تلاتة على تمنية أقرب لصفر ولّا أقرب لواحد. وبما إن تلاتة على تمنية أقل من نصّ؛ لأن تلاتة على تمنية أقل من أربعة على تمنية، اللي هي بتمثّل نصّ. فبالتالي هيبقى الكسر تلاتة على تمنية أقرب إلى صفر. فمعنى كده إن العدد الكسري خمسة وتلاتة على تمنية أقرب إلى خمسة.

بعد كده هنشوف العدد الكسري سبعة واتنين على حداشر. فهنلاحظ إنه بيقع ما بين سبعة وتمنية. بعد كده هنشوف الكسر اتنين على حداشر أقرب إلى صفر ولّا أقرب إلى واحد. فهنلاحظ إن اتنين على حداشر أقرب إلى صفر. فبالتالي هيبقى العدد الكسري سبعة واتنين على حداشر أقرب إلى سبعة.

بعد كده هنشوف العدد الكسري خمسة وواحد على أربعة. وهنلاحظ إنه بيقع ما بين خمسة وستة. بعد كده هنشوف الكسر واحد عَ الأربعة أقرب إلى صفر ولّا أقرب إلى واحد. وبما إن واحد عَ الأربعة يعني ربع؛ أقل من نصّ، فبالتالي هيبقى واحد عَ الأربعة أقرب إلى صفر. فمعنى كده إن العدد الكسري خمسة وواحد على أربعة أقرب إلى خمسة.

فكده يبقى قرّبنا كل عدد كسري لأقرب عدد صحيح. بعد كده هنبدأ نحسب. فهيبقى عندنا خمسة في، سبعة ناقص خمسة. وأول حاجة هنحسب ما بداخل القوسين. فهنحسب سبعة ناقص خمسة، هتساوي اتنين. بعد كده هنضرب خمسة في اتنين، فلمّا نحسبها هتساوي عشرة.

وبالتالي هيبقى تقدير الناتج هو عشرة. يعني الاختيار رقم تلاتة هو الإجابة الصحيحة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.