فيديو: حجم الهرم الرباعي

يوضِّح الفيديو القانون المستخدم في إيجاد حجم الهرم الرباعي، وعلاقته بقانون حجم متوازي المستطيلات.

٠٤:٥٣

‏نسخة الفيديو النصية

هنتكلم عن حجم الهرم الرباعي. هنفتكر في الأول حجم متوازي المستطيلات، وبعدين هنعرف حجم الهرم الرباعي، ونشوف إزاي هنقدر نطبق عليه.

في البداية، لو عندنا متوازي مستطيلات بالشكل ده. وهنفترض إن أبعاده كانت س وَ ص وَ ع. بالتالي حجم متوازي المستطيلات هيساوي حاصل ضرب أبعاده في بعض. يعني هيساوي س في ص في ع.

لو عايزين نشوف العلاقة بين شكل متوازي المستطيلات وشكل الهرم الرباعي، فهنلاقي إن شكل الهرم الرباعي بالشكل ده. عشان نقدر نعرف أكتر العلاقة بين متوازي المستطيلات والهرم الرباعي، هنفترض عندنا إناء على شكل متوازي المستطيلات، وفيه مية. لو محتاجين نفضّي المية اللي بداخل الإناء اللي على شكل متوازي المستطيلات، في إناء آخر على شكل هرم رباعي بالشكل ده. محتاجين نشوف هنحتاج كام إناء على شكل هرم رباعي؛ عشان أقدر أفضي فيهم كل المية اللي موجودة في الإناء اللي على شكل متوازي مستطيلات. هنلاقي إن إحنا محتاجين تلات أشكال من الإناء اللي على شكل الهرم الرباعي.

يبقى كمية المية اللي بداخل الإناء اللي على شكل متوازي المستطيلات، محتاج أفرغها في تلات أشكال من الإناء اللي على شكل هرم رباعي بالشكل ده. وبالتالي أقدر أقول إن حجم الهرم الرباعي هيساوي واحد على تلاتة، مضروب في حجم متوازي المستطيلات. يعني حجم الهرم الرباعي هيساوي واحد على تلاتة في س في ص في ع. وبالتالي قدرت أجيب حجم الهرم الرباعي. وَ س هو الطول، وَ ص العرض، وَ ع الارتفاع بتاع الهرم الرباعي. فيبقى حجم الهرم الرباعي هيساوي واحد على تلاتة في أبعاد الهرم الرباعي. اللي هي واحد على تلاتة في س في ص في ع.

عايزين ناخد مثال. صفحة جديدة. مثلًا عندنا هرم رباعي بالشكل ده. ومعطى أبعاده اتنين سنتيمتر، وتلاتة سنتيمتر، والارتفاع أربعة سنتيمتر. وعايز أحسب حجم الهرم الرباعي. ويبقى نقدر نقول إن حجم الهرم الرباعي هيساوي واحد على تلاتة مضروبة في أبعاد الهرم الرباعي. أبعاد الهرم الرباعي هي اتنين سنتيمتر، وتلاتة سنتيمتر، وأربعة سنتيمتر. يبقى حجم الهرم الرباعي يساوي واحد على تلاتة في اتنين في تلاتة في أربعة. يعني هيساوي تمنية سنتيمتر مكعب.

هناخد مثال آخر. لو عندنا هرم رباعي بالشكل ده. ومعطى إن طوله ستة سنتيمتر، وعرضه ستة سنتيمتر. وإن حجم الهرم الرباعي بيساوي ستين سنتيمتر مكعب. ومطلوب نوجد ارتفاع الهرم الرباعي.

عشان نقدر نوجد ارتفاع الهرم الرباعي، هنستخدم حجم الهرم الرباعي. يبقى حجم الهرم الرُّباعي هيساوي واحد على تلاتة مضروبة في أبعاد الهرم الرُّباعي. يعني هيساوي واحد على تلاتة في ستة سنتيمتر في ستة في … هنرمز للارتفاع بالرمز ع. ويبقى حجم الهرم الرُّباعي هيساوي واحد على تلاتة في ستة في ستة في ع. وبالتالي حجم الهرم الرباعي كان مُعطى إن هو بيساوي ستين سنتيمتر مكعب. يبقى هنعوّض عن حجم الهرم الرباعي بستين سنتيمتر مكعب. يبقى ستين هيساوي واحد على تلاتة في ستة في ستة في ع. ويبقى من هنا أقدر أقول إن ع هتساوي خمسة سنتيمتر. يبقى أنا قدرت أحصل على ارتفاع الهرم الرباعي، وكان بيساوي خمسة سنتيمتر.

يبقى إحنا عرفنا إيه هو حجم الهرم الرباعي، وإزاي أقدر أطبق عليه.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.